Ախտանիշներ - Ուիպլի հիվանդություն

Ախտահարելով ստամոքսաղիքային համակարգը՝ Ուիպլի հիվանդությունն առաջին հերթին վնասում է բարակ աղու թավիկային համակարգը՝ հանգեցնելով ներծծման խանգարման, թեև, որպես կանոն, նաև ախտահարում է ցանկացած օրգան, այդ թվում՝ սիրտը, թոքերը, հոդերը, մաշկը, գլխուղեղը և աչքերը։

Ընդհանուր գանգատներ և ախտանիշներ

Մարսողական գանգատներն ու ախտանիշները տարածված են Ուիփլի հիվանդության ժամանակ և կարող են ներառել հետևյալը՝

• փորլուծություն
• ստամոքսի կծկանքներ և ցավեր, որոնք կարող են սրվել ուտելուց հետո
• քաշի կորուստ՝ կապված սննդանյութերի անբավարար ներծծման հետ (կոչվում է մալաբսորբցիա):

Ուիպլի հիվանդության հետ կապված այլ հաճախակի հանդիպող գանգատներից և ախտանիշներից են՝

• բորբոքված հոդեր, մասնավորապես՝ արմնկային, ծնկային և դաստակային
• հոգնածություն
• թուլություն
• սակավարյունություն (անեմիա):

Ավելի քիչ հանդիպող գանգատներ և ախտանիշներ

Որոշ դեպքերում Ուիպլի հիվանդությունը կարող է հանգեցնել հետևյալ գանգատների և ախտանիշների՝

• ջերմություն
• հազ
• մեծացած (այտուցված) ավշային հանգույցներ
• մաշկի մգացում արևի տակ գտնվող տարածքներում և սպիների մեջ
• կրծքավանդակային ցավեր:

Ուղեղային և նյարդային համակարգի (նյարդաբանական կամ նևրոլոգիական) գանգատներից և ախտանիշներից են՝

• քայլքի դժվարացում
• տեսողական խնդիրներ, այդ թվում՝ աչքի շարժումների վերահսկման թուլացում
• շփոթվածություն
• հիշողության կորուստ:

Այս հիվանդությամբ տառապող մարդկանց մեծ մասի մոտ ախտանշանները զարգանում են դանդաղորեն` երկար տարիների ընթացքում: Որոշ մարդկանց մոտ ախտանիշները, ինչպիսիք են հոդացավը և քաշի կորուստը, զարգանում են ախտորոշմանն օգնող մարսողական ախտանիշներից տարիներ առաջ:

Ե՞րբ դիմել բժշկին

Ուիպլի հիվանդությունը հնարավոր վտանգ է ներկայացնում կյանքի համար, սակայն սովորաբար բուժելի է: Կապ հաստատեք ձեր բժշկի հետ, եթե զգում եք անսովոր գանգատներ կամ ախտանիշներ, ինչպիսիք են անբացատրելի քաշի կորուստը կամ հոդացավը: Բժիշկը կարող է նշանակել հետազոտություններ՝ պարզելու ձեր ախտանիշների պատճառը:

Նույնիսկ այն բանից հետո, երբ ձեր վարակն ախտորոշվել է և բուժում եք ստանում, տեղեկացրեք բժշկին, եթե ձեր ախտանիշները չեն բարելավվում: Երբեմն հակաբիոտիկային բուժումն արդյունավետ չէ, քանի որ բակտերիաները դիմացկուն են կոնկրետ դեղամիջոցի նկատմամբ, որն ընդունում եք: Հիվանդությունը կարող է կրկնվել, ուստի կարևոր է հետևել ախտանիշներին, որոնք կարող են կրկնվել: