Պատճառներ - Իգական անօրգազմիա

Սեռական գրգռումը, վերելքը և օրգազմը (հեշտանքը) բարդ ռեակցիաներ են, որոնք ներառում են տարբեր ֆիզիկական (մարմնական), հուզական, զգայական և հոգեբանական գործոններ:

Այս ոլորտներից որևէ մեկի հետ կապված խնդիրները կարող են ազդել ցանկալի օրգազմին հասնելու ձեր ունակության վրա:

Անձնային և հոգեբանական գործոններ

Անցյալի փորձը, վարքագծերը, նախապատմությունը կամ հոգեկան վիճակը կարող են նպաստել օրգազմի հետ կապված խնդիրների առաջացմանը: Դրանք ներառում են՝

• անցյալում սեռական կամ հուզական բռնություն
• սեռական խթանման կամ փոխազդեցությունների մասին գիտելիքների պակաս
• վատ ինքնագնահատական
• սեռական հարաբերության հետ կապված մեղքի զգացում կամ ամոթ
• սեռական հարաբերության վերաբերյալ մշակութային կամ կրոնական համոզմունքներ
• սթրեսածին գործոններ, ինչպիսիք են ֆինանսական խնդիրները կամ սիրելիի կորուստը
• հոգեկան առողջության խնդիրներ, ինչպիսիք են անհանգստությունը կամ դեպրեսիան:

Փոխհարաբերությունների գործոններ

Ձեր սեռական զուգընկերոջ հետ ունեցած խնդիրները կարող են նպաստել օրգազմի հետ կապված խնդիրներին: Դրանք կարող են ներառել՝

• հուզական մտերմության պակաս կամ բացակայություն
• չլուծված հակասություններ
• սեռական կարիքների և նախասիրությունների վերաբերյալ վատ տեղեկացվածություն
• անհավատարմություն կամ վստահության չարաշահում
• ինտիմ զուգընկերոջ կողմից բռնություն
• զուգընկերոջ սեռական դիսֆունկցիա, օրինակ՝ էրեկտիլ դիսֆունկցիայով տղամարդ զուգընկեր:

Ֆիզիկական (մարմնական) պատճառներ

Հիվանդությունների լայն շրջանակը, արտաքին փոփոխությունները և դեղամիջոցները կարող են խանգարել օրգազմին:

• Առողջական խնդիրներ. երկարաժամկետ հիվանդությունները, ինչպիսիք են դիաբետը, գերակտիվ միզապարկը կամ ցրված սկլերոզը, կարող են նպաստել կամ բարդացնել օրգազմի խանգարման գործոնները:
• Գինեկոլոգիական բուժում. Հյուսվածքների վնասումը գինեկոլոգիական վիրահատություններից առաջացած հյուսվածների վնասումը, ինչպիսիք են հիստերէկտոմիան (արգանդի հեռացում) կամ քաղցկեղի վիրահատությունը, կարող են ազդել օրգազմ ունենալու ունակության վրա:
• Դեղորայք. դեղատոմս պահանջող և չպահանջող բազմաթիվ դեղեր կարող են արգելակել օրգազմը, ներառյալ արյան ճնշման դեղերը, հակափսիխոտիկ դեղամիջոցները, հակահիստամինները և հակադեպրեսանտները, մասնավորապես՝ սերոտոնինի ետզավթման ընտրողական արգելակիչները (ինհիբիտորներ):
• Ալկոհոլը և ծխելը. ալկոհոլն ընկճում է նյարդային համակարգը և կարող է խանգարել օրգազմ ունենալու կարողությանը։ Ծխելը կարող է սահմանափակել արյան հոսքը դեպի սեռական օրգաններ՝ խանգարելով օրգազմի զարգացմանը։
• Մարմնի տարիքային փոփոխություններ. դաշտանադադարից հետո կամ ավելի ուշ կյանքում զարգացող օրգանիզմի փոփոխությունները կարող են նպաստել սեռական գործունեության տարբեր տեսակի խանգարումների առաջացմանը:

Փոխկապված սեռական խանգարումներ

Անօրգազմիայով տառապող կանայք կարող են ունենալ մեկ կամ մի քանի փոխկապված սեռական խնդիրներ: Սրանք կարող են նպաստել կամ բարդացնել օրգազմի հետ կապված խնդիրը: Այս վիճակները ներառում են՝

• սեռական գրգռման և վերելքի հետ կապված խնդիրներ
• սեռական հարաբերության քիչ ցանկություն կամ նման ցանկության բացակայություն
• սեռական հարաբերությունից կամ այլ սեռական խթանումից առաջացող ցավ
• հեշտոցի կամ ամոթույքի (վուլվայի) չորություն
• հեշտոցի ակամա կծկում (վագինիզմ):