Պատճառներ - Փորլուծություն հակաբիոտիկից

Թե ինչու է առաջանում հակաբիոտիկ-կապված փորլուծությունը, լիարժեք հասկանալի չէ:

Սովորաբար ենթադրվում է, որ այն զարգանում է, երբ հակաբակտերիալ դեղամիջոցները (հակաբիոտիկները) ձեր ստամոքս-աղիքային խողովակում խախտում են լավ և վատ բակտերիաների հավասարակշռությունը:

Առավել հավանական փորլուծություն առաջացնող հակաբիոտիկներ

Գրեթե բոլոր հակաբիոտիկները կարող են առաջացնել հակաբիոտիկ-կապված փորլուծություն: Սակայն, փորլուծություն ավելի հաճախ առաջացնում են հետևյալ խմբերի հակաբիոտիկները՝

• մակրոլիդները, ինչպիսին է Կլարիթրոմիցինը
• ցեֆալոսպորինները, ինչպիսիք են Ցեֆդինիրը և Ցեֆպոդոքսիմը
• ֆտորխինոլոնները, ինչպիսիք են Ցիպրոֆլոքսացինը և Լևոֆլոքսացինը
• պենիցիլինները, ինչպիսիք են Ամոքսիցիլինը և Ապիցիլինը:

C. difficile վարակ

Երբ հակաբիոտիկները խախտում են ձեր մարսողական համակարգի բակտերիաների հավասարակշռությունը, C. difficile բակտերիաները կարող են արագորեն և անվերահսկելի կերպով աճել: C. difficile բակտերիաները ստեղծում են թույներ (տոքսիններ), որոնք վնասում են աղիների լորձաթաղանթը: C. difficile վարակի հետ առավել հաճախ կապված հակաբիոտիկներից են Կլինդամիցինը, ֆտորխինոլոնները, ցեֆալոսպորինները և պենիցիլինները, թեև գրեթե ցանկացած հակաբիոտիկ ընդունելը կարող է ձեզ ռիսկի ենթարկել:

Ռիսկի գործոններ

Հակաբիոտիկ-կապված փորլուծություն կարող է առաջանալ յուրաքանչյուրի մոտ, ով հակաբիոտիկ է ընդունում: Այնուամենայնիվ, հակաբիոտիկների հետ կապված լուծի հավանականությունը մեծ է, եթե դուք՝

• անցյալում ունեցել եք հակաբիոտիկ-կապված փորլուծություն
• երկար ժամանակ ընդունել եք հակաբիոտիկային դեղամիջոցներ
• ընդունում եք մեկից ավելի հակաբիոտիկային դեղամիջոց: