Հակաբիոտիկ-կապված փորլուծություն. ախտանիշներ

1 րոպե

Մարդկանց մեծ մասի համար հակաբիոտիկ-կապված փորլուծությունն առաջացնում է թեթև գանգատներ և ախտանիշներ:

Դրանցից են՝

• թուլացած կղանք
• ավելի հաճախակի աղիքների դատարկում:

Հակաբիոտիկ-կապված փորլուծությունը հավանաբար կսկսվի հակաբիոտիկ ընդունելուց մոտ մեկ շաբաթ անց: Երբեմն, սակայն, փորլուծությունը և այլ ախտանշանները կարող են ի հայտ չգալ հակաբիոտիկների բուժումն ավարտելուց օրեր կամ նույնիսկ շաբաթներ անց:

Clostridioides difficile (նախկինում՝ Clostridium difficile) վարակ

C. difficile-ն թույն (տոքսին) արտադրող բակտերիա է, որը կարող է ավելի լուրջ հակաբիոտիկ-կապված փորլուծություն առաջացնել: Ի լրումն այն բանի, որ C. difficile վարակը կարող է առաջացնել կղանքի թուլացում և ավելի հաճախակի կղազատում, այն նաև կարող է զարգացնել՝

• ծանր փորլուծություն և ջրազրկում
• ստորորովայնի ցավ և ջղաձգություն (սպազմ)
• ցածր աստիճանի ջերմություն
• սրտխառնոց
• ախորժակի կորուստ:

Ե՞րբ դիմել բժշկին

Անմիջապես զանգեք ձեր բժշկին, եթե ունեք հակաբիոտիկ-կապված փորլուծության լուրջ գանգատներ և ախտանիշներ: Այս գանգատներն ու ախտանիշները հաճախ դրսևորվում են մի շարք այլ վիճակների ժամանակ, ուստի ձեր բժիշկը կարող է խորհուրդ տալ հետազոտություններ, ինչպիսիք են կղանքի կամ արյան թեստերը՝ պատճառները պարզելու համար: