Ցավ ձեռքերում

3 րոպե

Ձեր վերջին վերջուկթը կարող է ցավել բազմաթիվ տարբեր պատճառներով՝ սկսած հոդերի վնասվածքներից մինչև նյարդերի ճնշում:

Կախված պատճառից, ձեռքերից մեկնումեկի կամ երկուսի որևէ շրջանում կամ ամբողջ վերջույթով տարածվող ցավը կարող է սկսվել հանկարծակի կամ զարգանալ աստիճանաբար:

Բազմաթիվ դեպքերում ձեռքի ցավը կարող է իրականում առաջանալ ոչ թե տվյալ վերջույթում, այլ՝ պարանոցում կամ թիկունքում առկա խնդիրների պատճառով: Պետք է նաև նկատի ունենալ, որ ձեռքի ցավը, մասնավորապես, դեպի ձեր ձախ վերին վերջույթ ճառագայթվող և ընդհանուր թուլությամբ ուղեկցվող ցավերը կարող են լինել սրտամկանի ինֆարկտի նշաններից մեկը:

Պատճառներ

Ձեռքի ցավերի հնարավոր պատճառներից են՝

• կրծքահեղձուկ (ստենոկարդիա, երբ նվազում է սրտի արյունամատակարարումը)
• բազկային հյուսվածքի վնասվածք
• ձեռքի և դաստակի կոտրվածքներ
• բուրսիտներ (հոդի ձուսպապարկի բորբոքում)
• կարպալ թունելի համախտանիշ
• պարանոցային ողնաշարի սկավառակի ճողվածք
• Դե Քվերվեյնի տենդոսինովիտ
• արմնկային հոդաբորբ
• ֆիբրոմիալգիա
• սրտամկանի ինֆարկտ
• ռևմատոիդ արթրիտ (հոդերի քրոնիկ աուտոիմուն բորբոքային հիվանդություն)
• բազկի պտտական մանժետի վնասվածք
• ձգվածություն (растяжения)
• տենդոնիտ (ջլի բորբոքում)
• կրծքային ելքի համախտանիշ
• արմնկային նյարդի ճմլում:

Ե՞րբ դիմել բժշկին

Դիմեք անհետաձգելի բուժօգնության, եթե ունեք՝

• հանկարծակի սկսված և անսովոր սաստիկ ցավեր ձեռքերի, ուսագոտու կամ թիկունքի շրջանում կամ ձեռքի ցավեր, որոնք ուղեկցվում են կրծքավանդակի կամ կրծոսկրի շրջանում սեղմող-ճնշող կամ ծանրության զգացումներով (սա կարող է ահազանգել սրտամկանի ինֆարկտի մասին)
• ձեռքի կամ դաստակի շրջանի ցայտուն ձևափոխում կամ դուրս ցցված ոսկոր, հատկապես, եթե ունեք արյունահոսություն կամ այլ վնասվածքներ:

Անհապաղ դիմեք ձեր բժշկին, եթե ունեք՝

• ձեռքի, ուսագոտու կամ թիկունքի ցավեր, որոնք առաջանում են ֆիզիկական ակտիվության ժամանակ և մեղմանում հանգիստ վիճակում, որը կարող է լինել սրտամկանի անբավարար արյունամատակարարման նշան
• ձեռքի սուր վնասվածք, հատկապես, եթե լսում եք կոտրվածքի ձայն (խոշոր ոսկրերի բազմակի կամ ծանր բաց կոտրվածքի դեպքում կարող է զարգանալ տրավմատիկ շոկ)
• ձեռքի շրջանի ուժեղ ցավեր և այտուցվածություն
• ձեռքի ախտաբանական շարժունություն կամ նորմալ շարժունակության կորուստ:

Այցելեք ձեր բժշկին, եթե ունեք՝

• ձեռքի ցավեր, որոնք տնային խնամքից հետո չեն բարելավվում
• վնասված շրջանի կարմրություն, այտուցվածություն կամ ցավ:

Ինքնօգնություն

Նույնիսկ ձեռքի լուրջ վնասվածքների ժամանակ տնային խնամքի միջոցառումները կարող են որոշակիորեն օգտակար լինել: Եթե կարծում եք, որ ունեք ձեռքի կամ դաստակի կոտրվածք, ապա վնասված շրջանում կիրառված սառեցնող միջոցառումները և նույն ձեռքի որոշակի անշարժացումը կարող են մեղմացնել ցավերը՝ մինչև կայցելեք բժշկական կենտրոն:

Ձեռքի վնասվածքների դեպքում օգտակար կարող են հետևյալ միջոցառումները, որոնք անգլերենով ըստ սկզբնատառերի ստացել են «R.I.C.E.» հապավումը: Դրանք են՝

• հանգիստ (Rest). խուսափեք ֆիզիկական ակտիվությունից, հատկապես վնասված ձեռքն օգտագործելուց կամ շարժելուց
• սառույց (Ice). օրական 3 անգամ 15-20 րոպե վնասված շրջանի վրա դրեք սառցեպարկ
• սեղմող վիրակապ (Compression). օգտագործեք սեղմող վիրակապ՝ ուղղված ձեռքի այտուցի նվազեցմանը
• ձեռքի բարձր դիրք (Elevation). հնարավորության դեպքում ձեռքին տվեք բարձր դիրք, որպեսզի մեղմացնեք այտուցը: