Ախտանիշներ - Թունավորում շմոլ գազով

Շմոլ գազով կամ ածխածնի մոնօքսիդով թունավորումն առավելապես ազդում է գլխուղեղի և սրտի վրա։

Ժամանակի ընթացքում շմոլ գազի ազդեցությունը կարող է հանգեցնել ախտանիշների, որոնք կարող են շփոթվել առանց ջերմության ընթացող գրիպի հետ: Ածխածնի մոնօքսիդի թունավորման ավելի հստակ ախտանիշները կարող են ներառել՝

• գլխացավ՝ բութ, շարունակական, առավել կենտրոնացված ճակատային շրջանում
• թուլություն
• գլխապտույտ
• սրտխառնոց կամ փսխում
• շնչարգելություն և հևոց
• շփոթվածություն և իրականության աղճատված ընկալում
• մշուշոտ տեսողություն
• քնկոտություն
• մկանային վերահսկման կորուստ
• գիտակցության կորուստ:

Նյարդային համակարգի և գլխուղեղի հետ կապված ախտանիշները նաև կարող են ի հայտ գալ ածխածնի մոնօքսիդի թունավորումից վերականգնվելուց հետո: Նման վիճակի ռիսկն ավելի բարձր է այն մարդկանց մոտ, ովքեր կորցրել են գիտակցությունը և տարեց մարդկանց մոտ: Ախտանիշները կարող են ներառել՝

• հիշողության կորուստ
• անձնային փոփոխություններ
• շարժողական խնդիրներ:

Ածխածնի մոնօքսիդով թունավորումը կարող է հատկապես վտանգավոր լինել այն մարդկանց համար, ովքեր քնած են, հարբած կամ թմրամիջոցների ազդեցության տակ: Շմոլ գազը կարող է գլխուղեղի ծանր վնասման կամ մահվան պատճառ դառնալ՝ նախքան որևէ մեկը կհասկանա, որ խնդիր կա:

Ե՞րբ դիմել բժշկին

Ածխածնի մոնօքսիդով հնարավոր թունավորման դեպքում անմիջապես դուրս եկեք մաքուր օդի պայմաններ և անմիջապես դիմեք բուժօգնության: