Կանխարգելում - Կարդիոգեն շոկ

Կարդիոգեն շոկի կանխարգելման լավագույն միջոցը ապրելակերպի փոփոխություններն են՝ ուղղված ձեր սիրտն առողջ պահելուն և արյան ճնշման վերահսկմանը:

• Մի՛ ծխեք և խուսափեք երկրորդային ծխից. եթե ծխում եք, սրտամկանի ինֆարկտի ռիսկը նվազեցնելու լավագույն միջոցը ծխելը թողնելն է:
• Պահպանեք առողջ քաշը. ավելորդ քաշը նպաստում է սրտամկանի ինֆարկտին և կարդիոգեն շոկի այլ ռիսկային գործոններին, ինչպիսիք են բարձր արյան ճնշումը (հիպերտենզիա), սրտանոթային հիվանդությունները և շաքարային դիաբետը: Ընդամենը 4,5 կիլոգրամ կորցնելը կարող է նվազեցնել արյան ճնշումը և բարելավել խոլեստերինի մակարդակը:
• Կերեք ավելի քիչ խոլեստերին և հագեցած ճարպեր. սրանց, հատկապես հագեցված ճարպերի սահմանափակումը կարող է նվազեցնել սրտային հիվանդության ռիսկը: Խուսափեք տրանս-ճարպերից:
• Ավելի քիչ աղ օգտագործեք. ավելցուկային կերակրի աղը (նատրիում) հանգեցնում է օրգանիզմում հեղուկի կուտակմանը, որը կարող է լարել սիրտը: Նպատակ դրեք հասնել օրական 2300 միլիգրամից (մգ) պակաս նատրիումի օգտագործմանը: Աղն առկա է բազմաթիվ պահածոների և վերամշակված ապրանքների մեջ, ուստի լավ գաղափար է ստուգել սննդամթերքի պիտակները:
• Կրճատեք շաքարը. սա կօգնի ձեզ խուսափելու սննդանյութերով աղքատ կալորիաներից և պահպանելու առողջ քաշը:
• Սահմանափակեք ալկոհոլը. եթե ընտրում եք ալկոհոլ օգտագործել, արեք դա չափավոր: Առողջ չափահասների համար դա նշանակում է օրական մինչև մեկ ստանդարտ չափաբաժին (drink) կանանց համար և օրական մինչև երկու չափաբաժին տղամարդկանց համար:
• Կանոնավոր վարժանքներ արեք. ֆիզիկական վարժանքները կարող են նվազեցնել ձեր արյան ճնշումը և բարելավել ձեր արյան անոթների և սրտի ընդհանուր առողջությունը: Հասեք շաբաթական առնվազն 150 րոպե չափավոր աերոբիկ ակտիվություն կամ 75 րոպե ակտիվ աերոբիկ ակտիվություն կամ չափավոր և ուժեղ ակտիվության համակցության: Խորհուրդ է տրվում վարժանքների այս ծավալը բախշել մեկ շաբաթվա վրա։ Ավելի շատ վարժանքները կապահովեն ավելի մեծ առողջական օգուտներ:

Եթե ունեք սրտամկանի ինֆարկտ, արագ գործողությունները կարող են օգնել կանխելու կարդիոգեն շոկի զարգացումը: Շտապ բժշկական օգնություն դիմեք, եթե կարծում եք, որ սրտամկանի ինֆարկտ ունեք: