Ախտորոշում - Վիսցերալ զարկերակի սեղմում

Ընդերային զարկերակի սեղմման համախտանիշի (ԸԶՍՀ) ախտորոշման համար որևէ առանձնահատուկ հետազոտություն գոյություն չունի:

Ձեր բժիշկը մանրակրկիտ կզննի ձեզ և հարցեր կտա ձեր ախտանիշների և հիվանդության պատմության վերաբերյալ (անամնեզ): Արյան թեստերը և պատկերային հետազոտությունները կօգնեն ձեր բժշկին, որ բացառի որովայնային ցավի այլ պատճառները:

Ձեր բժիշկը ձեր որովայնի վերին հատվածը սթետոսկոպով լսելիս կարող է առանձնացնել մի ձայն, որը կոչվում է բլթոց: Այս ձայնն առաջանում է, երբ արյունատար անոթն արգելափակված կամ նեղացած է:

Այլ առողջական վիճակները բացառելու և ԸԶՍՀ-ն ախտորոշելու համար օգտագործվող հետազոտությունները կարող են ներառել հետևյալը՝

• արյան թեստեր՝ լյարդի, ենթաստամոքսային գեղձի, երիկամների և այլ օրգանների գործունեության հետ կապված խնդիրները տարբերակելու համար
• որովայնային անոթների գերձայնային հետազոտություն (դուպլեքս)՝ որովայնի խոշոր զարկերակներով, այդ թվում՝ ընդերային զարկերակով արյան հոսքը ստուգելու համար
• վերին էնդոսկոպիա (էզոֆագոգաստրոդուոդենոսկոպիա)՝ կերակրափողը, ստամոքսը և բարակ աղու սկզբնական հատվածը (տասներկումատնյա աղի) ներսից դիտելու և, ըստ անհրաժեշտության, հյուսվածքային նմուշ վերցնելու համար (բիոպսիա)
• ստամոքսի դատարկման հետազոտություններ՝ ստամոքսից դեպի բարակ աղի սննդային խյուսի անցման արագությունը չափելու համար
• մագնիսա-ռեզոնանսային տոմոգրաֆիա (ՄՌՏ)՝ հաճախ՝ կոնտրաստային նյութի ներարկմամբ (մագնիսա-ռեզոնանսային անգիոգրաֆիա), որը կարող է կարևոր տեղեկություն տալ զարկերակներով և երակներով արյան հոսքի արագության մասին
• որովայնի խոռոչի համակարգչային տոմոգրաֆիա (ԿՏ)՝ ընդերային զարկերակի նեղացումը կամ արգելափակումը հաստատելու համար, հատկապես՝ կոնտրաստային նյութ օգտագործելիս (ԿՏ անգիոգրաֆիա):