Ախտանիշներ - Վիսցերալ զարկերակի սեղմում

Հաճախ ընդերային զարկերակի (ցողունի) սեղմումը որևէ ախտանիշ չի առաջացնում:

Այնուամենայնիվ, ընդերային զարկերակի սեղմման համախտանիշ (ԸԶՍՀ) ունեցողները կարող են զգալ երկարաժամկետ (քրոնիկ) որովայնային ցավեր: Ախտանիշները կարող են առաջանալ ընդերային զարկերակով արյան անբավարար հոսքի կամ նույն շրջանի նյարդերի սեղմման պատճառով:

ԸԶՍՀ-ի ախտանիշները ներառում են՝

• ստամոքսի շրջանի (որովայնի վերին կամ միջին հատվածների) ցավ, որը կարող է թուլանալ կամ մեղմանալ իրանը առաջ թեքելիս
• ստամոքսի ցավ, որը սկսվում է ուտելուց, ֆիզիկական գործ կամ վարժանք անելուց կամ մարմնի դիրքը փոփոխելուց հետո
• որովայնի փքվածություն
• փորլուծություն
• ցավի պատճառով սնունդ ընդունելու նկատմամբ վախ, որը կարող է հանգեցնել քաշի զգալի անկման, սովորաբար՝ ավելի քան 9,1 կիլոգրամ (20 ֆունտ)
• սրտխառնոց և փսխում:

Ե՞րբ դիմել բժշկին

Գոյություն ունեն ստամոքսի շրջանի ցավի բազմաթիվ տարբեր պատճառներ: Եթե, չնայած տնային միջոցներին, որովայնի ցավը շարունակվում է, դիմեք ձեր բժշկին: Ցավի կոնկրետ պատճառը պարզելու համար ձեզ անհրաժեշտ է անցնել մանրամասն ֆիզիկական քննություն (բուժզննում) և որոշակի հետազոտություններ:

Եթե ձեր ստամոքսի շրջանի ցավերը սուր են և ֆիզիկական ակտիվությունից կամ շարժումից ավելի են ուժգնանում, անմիջապես դիմեք ձեր բժշկին: Անմիջապես դիմեք բուժօգնության, եթե ստամոքսի շրջանի ցավն ուղեկցվում է հետևյալ խնդիրներով՝

• արյունային կղանք
• ջերմություն
• չմեղմացող սրտխառնոց և փսխում
• որովային դիպչելիս՝ սուր ցավոտություն և լարվածություն
• որովայնի փքվածություն
• մաշկի և աչքի սպիտակենու դեղնություն (դեղնուկ):

Երբեմն որովայնի վերին հատվածի (վերորովայնային) ցավը կարող է շփոթվել կրծքավանդակային (ետկրծոսկրային) ցավի հետ: Երբեմն դա կարող է կապված լինել սրտամկանի ինֆարկտի հետ: Զանգեք 1-03 և կանչեք շտապ օգնություն, եթե ունեք կրծքավանդակային կամ վերորովայնային ցավ՝ հետևյալ ախտանիշներից որևէ մեկի հետ կամ առանց դրա՝

• ետկրծոսկրային կամ կրծքավանդակի շրջանում ծանրության, ճնշման կամ ճզմվելու զգացողություն
• սեղմող կամ այրվող ցավ, որը ճառագայթվում՝ տարածվում է ծնոտի, պարանոցի, ուսերի և մեկ կամ երկու ձեռքերի վրա
• ցավ, որը տևում է ավելի քան մի քանի րոպե կամ սաստկանում է՝ կապված ֆիզիկական ակտիվության հետ
• շնչարգելություն և հևոց
• սառը քրտինք
• գլխապտույտ կամ թուլություն
• սրտխառնոց կամ փսխում: