Կոմա. պատճառներ

Կոմա. պատճառներ

Կոման զարգանում է գլխուղեղի կեղևի լրիվ արգելակման պատճառով։

Ծանոթացեք նաև այս հոդվածի հետ ուղղակիորեն կապված այլ նյութերի հետ:

Այն զարգանում է որպես կենտրոնական նյարդային համակարգում (առաջին հերթին՝ գլխուղեղ) թթվահիմնային հավասարակշռության խանգարումների, թթվածնային քաղցի (հիպօքսիա), իոնային փոխանակության խանգարումների և նյարդաբջիջների էներգետիկ քաղցի պատճառով։

Կոմա կարող է առաջանալ տարբեր բնույթի խնդիրներից:

  • Գանգուղեղային տրավմաներ. հաճախ գլխուղեղի տրավմատիկ վնասվածք առաջանում է ավտովթարների կամ բռնարարքների պատճառով:
  • Ինսուլտ. գլխուղեղը սնուցող զարկերակների խցանումը կամ պատռումը բերում է գլխուղեղի արյան սնուցման կտրուկ կրճատման կամ ընդհատման, որը կոչվում է ինսուլտ։
  • Ուռուցքներ. գլխուղեղում կամ ուղեղաբնում տեղակայված ուռուցքները կարող են առաջացնել կոմա:
  • Դիաբետ (շաքարախտ). արյան շաքարի մակարդակի խիստ բարձրացումը (հիպերգլիկեմիա) կամ անկումը (հիպոգլիկեմիա) կարող է առաջացնել կոմա:
  • Թթվածնի սուր պակաս (հիպօքսիա). ջրահեղձությունից կամ սրտամկանի ինֆարկտից հետո սիրտ-թոքային վերակենդանացման միջոցառումների շնորհիվ փրկված մարդկանց գիտակցությունը կարող է չվերականգնվել գլխուղեղի հիպօքսիայի պատճառով:
  • Վարակներ. էնցեֆալիտը կամ մենինգիտը կարող են առաջացնել գլխուղեղի, ողնուղեղի կամ ուղեղը շրջապատող հյուսվածքների այտուց: Այս վարակների ծանր դեպքերը կարող են վնասել գլխուղեղը կամ բերել կոմայի:
  • Ցնցումներ. երկարատև ընթացող կամ արագորեն միմյանց հաջորդող ցնցումային նոպաները կարող են բերել կոմայի:
  • Թույներ (տոքսիններ). սուր կամ ծանր թունավորումները, օրինակ՝ շմոլ գազով կամ կապարով, կարող են վնասել գլխուղեղը և առաջացնել կոմա:
  • Թմրամիջոցներ և ալկոհոլ. թմրամիջոցների կամ ալկոհոլի մեծ քանակների օգտագործումը (գերդոզավորում) կարող է հանգեցնել կոմայի:

Հոդվածը վերանայվել է՝ 09-04-2021