Ուշացած սերմնաժայթքում

Ուշացած սերմնաժայթքում

Որոշ տղամարդիկ կարող են նշել, որ սեռական հարաբերության ժամանակ սերմնաժայթքումը վրա է հասնում միայն երկարատև սեռական խթանումից հետո։

Ընդ որում, սերմնաժայթքումը (էյակուլյացիա) կարող է ձգձգվել նույնիսկ նորմալ սեռական ցանկության և էրեկցիայի պայմաններում։

Ավելին, կան տղամարդիկ, ում մոտ ընդհանրապես սերմնաժայթքում չի հաջողվում (կոչվում է անէյակուլյացիա)։ Նման իրավիճակի հանդիպելով տղամարդկանց մի մասը կարող է հիասթափվել կամ համարել որպես առողջական լուրջ խնդրի առկայություն, իսկ մյուս մասը որևէ ուշադրություն չդարձնել։

Ընդունված է, որ սերմնաժայթքումն ուշացած է, եթե՝

  • այն չի հաջողվում, երբ դուք շուրջ 30-60 րոպե ցանկանում եք «հանգստանալ»
  • այն բացակայում է ձեր սեռական հարաբերությունների շուրջ կեսի ժամանակ։

Երկարաձգված սերմնաժայթքումը կարող է ունենալ ժամանակավոր բնույթ կամ շարունակվել ողջ կյանքի ընթացքում։ Երկարաձգված սերմնաժայթքման հնարավոր պատճառներից են որոշ քրոնիկ հիվանդությունները, վիրահատությունները և դեղամիջոցները:

Ուշացած սերմնաժայթքման բուժումը կախված է պատճառից: Օրինակ, եթե սերմնաժայթքման ուշացման պատճառը դեղամիջոցներն են, պետք է ձեր բժշկի հետ քննարկել դրանք փոփոխելու հնարավորությունը։ Այլ դեպքերում, օրինակ՝ ֆիզիկական խնդիրների դեպքում սերմնաժայթքումը կարելի է արագացնել, եթե բուժեք հիմնական հիվանդությունը կամ մեղմացնեք դրա ընթացքը։ Զրուցեք այս թեմայով ձեր բժշկի հետ։ Եթե սերմնաժայթքման ուշացումն ունի հոգեբանական պատճառներ, լավագույն մոտեցումը ձեր սեռական զուգընկերոջ հետ տվյալ խնդրի շուրջ ազատ քննարկման նախաձեռնումն է, կամ, եթե արդյունք չի տալիս, հոգեկան առողջության ոլորտի մասնագետին (հոգեթերապևտ) կամ սեքսոպաթոլոգին (սեռախտաբան) դիմելը։

Երբ ժամանակ առ ժամանակ ձեր սերմնաժայթքումը ուշանում է, նման վիճակը դեռ չի կարելի որակել որպես առողջական խնդիր։ Այն վերածվում է խնդրի, երբ սկսում է անհանգստացնել ձեզ կամ ձեր սեռական զուգընկերոջը։

Հոդվածը վերանայվել է՝ 10-05-2021