Գրադարան

Ուշացած սերմնաժայթքում. ախտանիշներ

Ուշացած սերմնաժայթքում. ախտանիշներ

Time Read 2 րոպե

Ուշացած սերմնաժայթքում ունեցող որոշ տղամարդկանց օրգազմ ունենալու և սերմնաժայթքման համար պահանջվում է 30 րոպե կամ ավելի երկար սեռական խթանում:

Այլ տղամարդիկ կարող են ընդհանրապես չկարողանալ սերմնաժայթքել (անէյակուլացիա):

Իրականում, որևէ հստակ ժամանակ չկա, որից ելնելով կարելի է ախտորոշել ուշացած սերմնաժայթքումը: Դրա փոխարեն, դուք հավանաբար ուշացած սերմնաժայթքում ունեք, եթե հետաձգումն անհանգստություն կամ հիասթափություն է առաջացնում, կամ եթե ստիպված եք դադարեցնել սեռական գործունեությունը հոգնածության, ֆիզիկական գրգռվածության, էրեկցիայի կորստի կամ ձեր զուգընկերոջ խնդրանքի պատճառով:

Հաճախ տղամարդիկ կարող են դժվարությամբ հասնել օրգազմի սեռական հարաբերության կամ զուգընկերոջ հետ սեռական այլ գործողությունների ժամանակ: Որոշ տղամարդիկ կարող են սերմնաժայթքել միայն ձեռնաշարժության ժամանակ (օնանիզմ):

Կախված ախտանիշներից, ուշացած սերմնաժայթքումը բաժանվում է հետևյալ տեսակների:

  • Ամբողջ կյանքի ընթացքում (ցմահ)՝ հակառակ ձեռք բերվածի. ցմահ ուշացած սերմնաժայթքման դեպքում խնդիրն առկա է սեռական հասունության պահից: Ձեռքբերովի ուշացած սերմնաժայթքումն առաջ է գալիս նորմալ սեռական գործունեության ժամանակաշրջանից հետո:
  • Ընդհանրացված՝ հակառակ իրավիճակայինի. ընդհանրացված ուշացած սերմնաժայթքումը չի սահմանափակվում որոշակի սեռական գործընկերներով կամ որոշակի տեսակի խթանմամբ: Իրավիճակային ուշացած սերմնաժայթքումը տեղի է ունենում միայն որոշակի հանգամանքներում կամ իրավիճակներում:

Այսպիսի դասակարգումն օգնում է ախտորոշել հիմքում ընկած պատճառը և որոշել, թե որն է ամենաարդյունավետ բուժումը:

Ե՞րբ դիմել բժշկին

Եթե ունեք ուշացած սերմնաժայթքման խնդիր, առաջին հերթին պետք է դիմել ձեր ընտանեկան բժշկին: Դիմեք նրան, եթե՝

  • ուշացած սերմնաժայթքումը ձեզ կամ ձեր սեռական զուգընկերոջ համար դարձել է խնդիր
  • ունեք այլ առողջական խնդիր կամ ընդունում եք դեղամիջոցներ, որոնք կարող են կապված լինել ուշացած սերմնաժայթքման հետ
  • ուշացած սերմնաժայքումից բացի ունեք նաև այլ ախտանիշներ, որոնք կարող են միմյանց հետ կապված լինել կամ չլինել:

Հոդվածը տեղադրվել է՝ 11-04-2021 վերանայվել է՝ 09-11-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով