Պատճառներ - Ուշացած սերմնաժայթքում

Ուշացած սերմնաժայթքումը կարող է առաջանալ դեղամիջոցների, որոշ քրոնիկ առողջական վիճակների և վիրահատությունների հետևանքով:

Կամ դա կարող է պայմանավորված լինել հոգեներգործուն նյութերի չարաշահմամբ կամ հոգեկան առողջության հետ կապված խնդիրներով, ինչպիսիք են դեպրեսիան, անհանգստությունը կամ սթրեսը: Շատ դեպքերում դա կապված է ֆիզիկական և հոգեբանական խնդիրների համակցության հետ:

Ուշացած սերմնաժայթքման հոգեբանական պատճառները ներառում են հետևյալը՝

• դեպրեսիա, տագնապ կամ հոգեկան առողջության այլ խնդիրներ
• սթրեսի, վատ հաղորդակցման կամ այլ պատճառներով փոխհարաբերությունների խնդիրներ
• սեռական ակտի կատարման նկատմամբ տագնապ
• վատ ինքնագնահատական
• մշակութային կամ կրոնական արգելքներ (տաբուներ)
• իրական սեռական հարաբերության և սեռական ֆանտազիաների միջև տարբերություններ:

Դեղամիջոցները և այլ նյութերը, որոնք կարող են ուշացած սերմնաժայթքման պատճառ դառնալ, ներառում են՝

• որոշ հակադեպրեսանտներ
• որոշակի բարձր ճնշման դեղեր
• որոշակի միզամուղներ
• որոշ հակափսիխոտիկ դեղամիջոցներ
• որոշ հակացնցումային դեղամիջոցներ
• ալկոհոլ, հատկապես՝ մեծ քանակներով օգտագործելիս (չարաշահում կամ ալկոհոլիզմ):

Հետաձգված սերմնաժայթքման ֆիզիկական պատճառները ներառում են՝

• որոշ բնածին արատներ, որոնք ազդում են տղամարդկանց վերարտադրողական համակարգի վրա
• օրգազմը կառավարող կոնքային նյարդերի վնասվածք
• որոշ վարկներ, ինչպիսին է միզուղիների վարակը
• շագանակագեղձի վիրահատություն, ինչպիսին են շագանակագեղձի ներմիզուկային (տրանսուրետրալ) ռեզեկցիան կամ շագանակագեղձի հեռացումը
• նյարդաբանական հիվանդություններ, ինչպիսիք են դիաբետիկ նեյրոպաթիան, ինսուլտը կամ ողնուղեղային նյարդերի վնասումը
• հորմոնների հետ կապված վիճակներ, ինչպիսիք են վահանաձև գեղձի հորմոնի ցածր մակարդակը (հիպոթիրեոզ) կամ տեստոստերոնի ցածր մակարդակը (հիպոգոնադիզմ)
• հետադարձ սերմնաժայթքում՝ վիճակ, երբ սերմնահեղուկը ետ է ժայթքում միզապարկ, այլ ոչ թե դուրս է գալիս առնանդամից:

Որոշ տղամարդկանց համար աննշան ֆիզիկական խնդիրը, որն առաջացնում է սերմնաժայթքման ուշացում, կարող է անհանգստություն առաջացնել սեռական հարաբերությունների ընթացքում սերմնաժայթքման վերաբերյալ: Արդյունքում առաջացող անհանգստությունը կարող է վատթարացնել ուշացած սերմնաժայթքումը:

Ռիսկի գործոններ

Մի շարք գործոններ կարող են մեծացնել ուշացած սերմնաժայթքման ռիսկը, այդ թվում՝

• մեծ տարիք. տարիքի հետ տղամարդկանց սերմնաժայթքումը ավելի է երկարաձգվում
• հոգեբանական խանգարումներ, ինչպիսիք են դեպրեսիան կամ տագնապը
• առողջական վիճակներ և հիվանդություններ, ինչպիսիք են շաքարային դիաբետը կամ ցրված սկլերոզը
• որոշ բուժման մեթոդներ, ինչպիսին է շագանակագեղձի վիրահատությունը
• դեղորայք, մասնավորապես որոշ հակադեպրեսանտներ, բարձր արյան ճնշման դեղամիջոցներ կամ միզամուղներ
• փոխհարաբերությունների խնդիրներ, ինչպիսիքն է ձեր զուգընկերոջ հետ վատ հաղորդակցումը
• ալկոհոլի չափից ավելի օգտագործում, հատկապես, եթե դուք երկար ժամանակ խմիչք եք օգտագործում: