Դրեսլերի համախտանիշ

2 րոպե

Դրեսլերի կամ սրտամկանի հետինֆարկտային համախտանիշը սրտապարկի բորբոքման՝ պերիկարդիտի առանձնահատուկ տեսակ է:

Այն ավելի հաճախ զարգանում է սրտամկանի ինֆարկտից հետո

Դերսլերի համախտանիշի մյուս անուններից են՝ սրտամկանի հետինֆարկտային համախտանիշ, հետտրավմատիկ պերիկարդիտ և հետպրիկարդիոտոմիկ համախտանիշ:

Ի՞նչ է Դրեսլերի համախտանիշը

Սիրտն արտաքինից շրջապատված է երկթաղանթ (արտաքին կամ առպատային՝ շարակցական-ֆիբրոզ և ներքին կամ ընդերային՝ շճային) պաշտպանիչ պարկով, որը կոչվում է սրտապարկ (պերիկարդ): Սրտապարկի առպատային և ընդերային թերթիկների միջև առկա է ճեղքանման խոռոչ, որը պարունակում է քիչ քանակությամբ շճային հեղուկ:

Դրեսլերի համախտանիշի ժամանակ բորբոքվում է այս սրտապարկը։ Սրտապարկի բորբոքումը կոչվում է պերիկարդիտ։ Համընդհանուր կարծիք կա, որ այս հիվանդությունը զարգանում է սրտի հյուսվածքի կամ սրտապարկի վնասվածքից հետո որպես իմունային համակարգի պատասխան ռեակցիա: Նման վնասվածք կարող է առաջանալ այնպիսի դրվագներից հետո, ինչպիսիք են սրտամկանի ինֆարկտը, սրտի վիրահատությունը կամ տրավմատիկ վնասվածքը: Ախտանիշներից են կրծքավանդակի կամ ետկրծոսկրային ցավը, որը կարող է իր բնույթով կամ սաստկությամբ նմանակվել սրտամկանի ինֆարկտին ուղեկցող ցավերին:

Ախտանիշներ

Ախտանիշներն ավելի հավանական է, որ ի հայտ գան սրտամկանի ինֆարկտից, կրծքային վիրահատությունից կամ վնասվածքից շաբաթներ կամ ամիսներ հետ: Դրեսլերի համախտանիշի հիմնական ախտանիշներից են՝

• կրծքավանդակի ցավ
• ջերմություն։

Ե՞րբ այցելել բժշկին

Եթե կրծքավանդակի ցավերը հանկարծակի կամ կայուն-ձգձգվող են, անհապաղ դիմեք բուժօգնության, քանի որ նման գանգատը կարող է լինել սրտամկանի ինֆարկտի կամ մեկ այլ լուրջ հիվանդության նշան:

Պատճառներ

Փորձագետները կարծում են, որ Դրեսլերի համախտանիշը զարգանում է սրտի վնասվածքին հաջորդող օրգանիզմի իմունային պատասխանի պատճառով: Ձեր օրգանիզմը պատասխան ռեակցիա է դրսևորում վնասված հյուսվածքների նկատմամբ՝ դեպի ախտահարված շրջան ուղարկելով իմունային բջիջներ և սպիտակուցներ (հակամարմիններ): Երբեմն այսպիսի պատասխանը հանգեցնում է պերիկարդի լրացուցիչ բորբոքման:

Դրեսլերի համախտանիշը նաև կարող է զարգանալ որոշ սրտի վիրահատություններից կամ միջամտություններից հետո:

Բարդություններ

Դրեսլերի համախտանիշ զարգացնող իմունային ռեակցիան նաև կարող է հանգեցնել ձեր թոքերը շրջապատող հյուսվածքներում հեղուկի կուտակման (պլևրալ էֆուզիա):

Հազվադեպ, Դրեսլերի համախտանիշը կարող է հանգեցնել ավելի լուրջ կամ ծանր բարդությունների:

• Կոնստրիկտիվ պերիկարդիտ. այս դեպքում սրտապարկն անդառնալի հաստանում և սպիանում է՝ խոչընդոտելով սրտի նորմալ աշխատանքը և առաջացնելով սրտային անբավարարություն: Վերջինս կարող է հանգեցնել ոտնաթաթերի և որովայնի այտուցվածության` օրգանիզմում հեղուկի կուտակման պատճառով:
• Սրտի տամպոնադա. սա կյանքին սպառնացող վիճակ է, քանի որ պերիկարդի տակ հավաքված հեղուկը սեղմում է սիրտը՝ խաթարելով վերջինիս աշխատանքը և հանգեցնելով սուր սրտային անբավարարություն: Վերջինս ընթանում է արյան ճնշման կտրուկ անկմամբ (կոլապս)։

Ախտորոշում

Բժիշկը կզրուցի ձեզ հետ, ստետոսկոպով կլսի ձեր սիրտը, ըստ անհրաժեշտության կնշանակի արյան և այլ թեստեր, և եթե ձեզ մոտ կասկածի պերիկարդիտ, կավելացնի կրծքավանդակի ռենտգեն՝ ստուգելու սրտի չափերը և ձևը։ Որոշ դեպքերում կարող է առաջանալ նաև համակարգչային տոմոգրաֆիկ (ԿՏ) կամ մագինսա-ռեզոնանսային տոմոգրաֆիկ (ՄՌՏ) հետազոտության անհրաժեշտություն։ Պերիկարդիտի ժամանակ բավականին օգտակար տվյալներ կարող է տրամադրել նաև էլեկտրասրտագրությունը (ԷՍԳ):

Բուժում

Դրեսլերի համախտանիշի բուժման նպատակը պերիկարդի բորբոքումը և ցավերը մեղմացնելն է:

Բուժումը կարող է ներառել հետևյալը:

• Ոչ ստերոիդ հակաբորբոքային դեղեր (ՈՍՀԲԴ-ներ). այս դեղերը կարող են օգնել բորբոքման և այտուցի մեղմացմանը: Օրինակներից են՝ Ասպիրին, Իբուպրոֆեն կամ Ինդոմեթացին:
• Կոլխիցին. Կոլխիցինը հաճախ նշանակում են ռեկուրենտ պերիկարդիտի բուժման մեջ:
• Սովորական ցավազրկողները կարող են օգնել կրծքավանդակի ցավի թեթևացմանը։

Բուժումից հետո ձեզ կարող են որոշ ժամանակ պահել մշտական հսկողության ներքո՝ վերահսկելու հնարավոր բարդությունները։

Կանխարգելում

Որոշ նախնական հետազոտությունները վկայում են, որ սրտային վիրահատությունից առաջ հակաբորբոքային դեղերի և Կոլխիցինի նշանակումը կարող են օգնել Դրեսլերի համախտանիշի կանխարգելմանը: