Գրադարան

Գալակտոռեա. պատճառներ

Գալակտոռեա. պատճառներ

Time Read 2 րոպե

Գալակտոռեան հաճախ պայմանավորված է պրոլակտին հարմոնի բարձր մակարդակով, որն արտադրվում է հիպոֆիզում (մակուղեղ) և ապահովում է ծննդաբերությունից հետո մայրական կաթնատվությունը:

Գալակտոռեայի հնարավոր պատճառներից են՝

  • որոշ դեղերի ընդունում, օրինակ՝ հանգստացնող դեղեր (սեդատիվներ), դեպրեսիայի բուժման դեղեր (հակադեպրեսանտներ), փսիխոզների բուժման դեղեր (հակափսիխոտիկներ) կամ բարձր արյան ճնշման դեղեր
  • ափիոնատիպ (օփիոիդային) թմրամիջոցների օգտագործում (օրինակ՝ հերոին)
  • բուսական հավելումների օգտագործում, օրինակ՝ սամիթ (фенхель), անիսոն (анис) կամ հացհամեմի սերմ (շամբալա, այծառվույտ, семена пажитника)
  • հակաբեղմնավորիչ հաբերի ընդունում
  • հիպոֆիզի ոչ քաղցկեղային ուռուցք (պրոլակտինոմա) կամ այլ հիվանդություններ
  • թերակտիվ վահանաձև գեղձ (հիպոթիրեոզ)
  • քրոնիկ երիկամային հիվանդություն
  • կրծքագեղձի գերխթանում՝ պայմանավորված սեռական կյանքով, կրծքագեղձերի և պտուկների հաճախակի ինքնազննմամբ կամ հագուստով գերշփմամբ
  • կրծքային վիրահատության, այրվածքների կամ այլ վնասվածքների ժամանակ կրծքավանդակի պատի նյարդերի վնասում
  • ողնուղեղային վնասվածքներ, ուռուցքներ կամ վիրահատություն
  • սթրես:

Իդիոպաթիկ գալակտոռեա

Երբեմն բժիշկները չեն կարողանում հայտնաբերել գալակտոռեայի պատճառը: Սա կոչվում է իդիոպաթիկ գալակտոռեա և կարող է նշանակել, որ կաթնագեղձի հյուսվածքն գերզգայուն է կաթնատվության հորմոնի՝ պրոլակտինի նկատմամբ: Այսպիսի գերզգայունության պատճառով պրոլակտինի նույնիսկ նորմալ մակարդակները կարող են առաջացնել կաթնահոսություն:

Գալակտոռեան տղամարդկանց մոտ

Տղամարդկանց մոտ գալակտոռեան կարող է կապված լինել արյան տեստոստերոնի ցածր մակարդակի հետ (արական հիպոգոնադիզմ) և սովորաբար ի հայտ է գալիս, երբ կրծքագեղձերը մեծանում կամ դառնում ցավոտ (գինեկոմաստիա): Տղամարդկանց ցածր տեստոստերոնը կապված է նաև էրեկտիլ դիսֆունկցիայի (իմպոտենցիա) և սեռական ցանկության նվազման հետ (ցածր լիբիդո):

Գալակտոռեան նորածինների մոտ

Երբեմն գալակտոռեա նաև հանդիպում է նորածինների մոտ: Սա պայմանավորված է ընկերքով նորածնի արյան հուն մուտք գործած մայրական էստրոգեն հորմոնով, որը կարող է մեծացնել նորածնի կրծքագեղձերի հյուսվածքը և առաջացնել պտուկներից կաթնային արտադրություն: Նման երևույթը ժամանակավոր է և ինքնուրույն անհետանում է:

Հոդվածը տեղադրվել է՝ 26-05-2021 վերանայվել է՝ 05-04-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով