Ախտանիշներ - Աճման ցավեր

Աճման ցավերը սովորաբար առաջացնում են ոտքերում նվացող (բութ) ցավի կամ թրթռոցի (պուլսացիայի) զգացողություն:

Իր բնույթով այս ցավը մկանային է և հաճախ առաջանում է ազդրերի առջևի և սրունքների կամ ծնկների ետին շրջաններում: Սովորաբար այս ախտանիշներն առաջանում են երկու ոտքերում: Որոշ երեխաներ աճման ցավերի դրվագների ընթացքում նաև կարող են զգալ որովայնի ցավ կամ գլխացավեր: Ցավն ամեն օր չի առաջանում: Այն առաջանում և անհետանում է:

Աճման ցավերը հաճախ հայտնվում են ուշ ցերեկը կամ վաղ երեկոյան և անհետանում առավոտյան: Երբեմն ցավը կարող է երեխային արթնացնել գիշերվա կեսին:

Ե՞րբ դիմել բժշկին

Խորհրդակցեք ձեր երեխայի բժշկի հետ, եթե մտահոգված եք ձեր երեխայի ոտքի ցավով կամ ցավը՝

• համառ է
• առավոտյան դեռ առկա է
• բավականաչափ ուժեղ է և խանգարում է ձեր երեխայի սովորական գործունեությանը
• տեղակայված է հոդերում
• կապված է վնասվածքի հետ
• ուղեկցվում է այլ գանգատներով կամ ախտանիշներով, ինչպիսիք են այտուցվածությունը, կարմրությունը, ցավոտությունը, ջերմությունը, կաղալը, ցանը, ախորժակի կորուստը, թուլությունը կամ հոգնածությունը: