Միջազգային նորմալացված գործակցի (ՄՆԳ, INR) հետազոտություն

2 րոպե

Միջազգային նորմալացված գործակցի (ՄՆԳ, INR) հետազոտությունը գնահատում է ձեր արյան մակարդման ժամանակը:

Բազմաթիվ լաբորատորիաներ այս ցուցանիշը ներկայացնում են պրոթրոմբինային ժամանակի (PT) և պրոթրոմբինային գործակցի (PI) հետ միասին:

ՄՆԳ-ն արյան թեստ է, որը նշանակվում է վերահսկելու արյունը «ջրիկացնող»` հակամակարդիչ դեղերի ընդունումը: ՄՆԳ կարող է նաև նշանակվել, եթե դուք ունեք արյան մակարդման հետ կապված որևէ խնդիր:

Ի՞նչն են հետազոտում

Պրոթրոմբինը ձեր լյարդում արտադրվող սպիտակուց է: Այն պատկանում է այն սպիտակուցների շարքին, որոնք հայտնի են որպես մակարդելիության գործոններ և օգնում են ձեր արյան նորմալ թանձրության (մածուցիկության) պահպանմանը: ՄՆԳ թեստով գնահատվում է ձեր արյան մակարդվելու ժամանակը կամ տևողությունը:

Ինչո՞ւ է այս թեստը նշանակվում

Վարֆարինը դեղամիջոց է, որը նշանակվում է որպես հակամակարդիչ (հակակոագուլյանտ) միջոց: Այն նվազեցում է արյան մածուցիկությունը և լայնորեն կիրառվում է արյան մակարդուկների (թրոմբի) բուժման ժամանակ, ինչպիսիք են՝ խորանիստ երակների թրոմբոզ և թոքային էմբոլիա, ինչպես նաև սրտամկանի ինֆարկտի կանխարգելման նպատակով այն անձանց մոտ, ովքեր ունեն շողացող առիթմիա, սրտի փականային արատներ կամ սրտի արհեստական փականներ: Վարֆարինի արդյունավետությունը գնահատվում է՝ հաշվի առնելով արյան մակարդման տևողության երկարացման չափը: Այսպիսով, եթե դուք օգտագործում եք Վարֆարին, ուրեմն կարիք կունենաք պարբերաբար ստուգելու ձեր ՄՆԳ ցուցանիշը:

Իրականում հակամակարդիչ դեղերը ձեր արյունը չեն ջրիկացնում, այլ պարզապես մեծացնում են արյան մակարդման ժամանակը:

Բժիշկը կարող է ՄՆԳ թեստ խորհուրդ տալ, որ ընտրի ձեզ համար Վարֆարինի ամենաճիշտ դեղաչափը:

Այս թեստը նաև կարող է օգտագործվել հետևյալ դեպքերում՝

• արյունահոսության վիճակի ստուգում
• արյան մակարդման խնդիրների ստուգում, հատկապես վիրահատությունից առաջ
• լյարդի գործունեության գնահատում:

Ինչպե՞ս նախապատրաստվել այս թեստին

ՄՆԳ-ի թեստը որևէ առանձնահատուկ պայման կամ պահանջ չունի: Սակայն, բազմաթիվ դեղեր, մթերքներ և հիվանդություններ կարող են ազդել արդյունքի վրա, ուստի տեղեկացրեք բժշկին ձեր ընդունած բոլոր դեղերի և հավելումների, ինչպես նաև սննդակարգի կտրուկ փոփոխությունների մասին:

Ձեր արդյունքների մեկնաբանումը

Եթե դուք ստանում եք Վարֆարինով բուժում, բժիշկը հավանաբար նախատեսել է ձեզ համար ցանկալի ՄՆԳ արժեքների միջակայք: Եթե ՄՆԳ-ն շատ բարձր է, նշանակում է, որ ձեր արյունը մակարդվում է շատ դանդաղ և առկա է արյունահոսության ռիսկ: Հակառակը, եթե ՄՆԳ-ն շատ ցածր է, նշանակում է, որ ձեզ մոտ արյան մակարդուկ առաջանալու ռիսկը բարձր է:

Եթե դուք չեք ընդունում Վարֆարին և ձեր ՄՆԳ-ն նորմայից բարձր է, ձեր բժիշկը հավանաբար ձեզ կուղեգրի լրացուցիչ հետազոտությունների:

Լրացուցիչ տեղեկատվություն

INR թեստի մասին

Այցելեք մեր կայքի Մեդեքս-Lab բաժինը, որ իմանաք պրոթրոմբինային ժամանակի, տոկոսի և ՄՆԳ-ի մասին ավելի մանրակրկիտ տեղեկություններ։

Արյան թեստերի մասին

Կարդացեք Մեդեքս-Health բաժնի արյան թեստերի ուղեցույցը, որ ընդհանուր տեղեկություններ իմանաք արյան թեստերի մասին, այդ թվում՝

• ինչի՞ մասին հոգ տանել մինչև լաբորատորիա այցելելը
• ի՞նչ է տեղի ունենում արյան հետազոտության ընթացքում
• ինչպիսի՞ ճշգրություն ունեն հետազոտության արդյունքները։