Գրադարան
Կիֆոզ. պատճառներ
1 րոպե
Առողջ ողնաշարը կազմող ոսկորները՝ ողները նման են սյունակի մեջ միմյանց վրա դասավորված գլանների:
Կիֆոզն առաջանում է, երբ մեջքի (թիկունքի) ողները դառնում են ավելի սեպաձև:
Ողնաշարի ձևը կարող է փոխվել հետևյալ պատճառներով:
- Կոտրվածքներ. կոտրված ողները կարող են հանգեցնել ողնաշարի կորության: Կոմպրեսիոն (սեղմված) կոտրվածքները, որոնք կարող են առաջանալ թուլացած ոսկորում, ամենատարածվածն են: Թեթև կոմպրեսիոն կոտրվածքները հաճախ նկատելի գանգատներ կամ ախտանիշներ չեն առաջացնում:
- Օստեոպորոզ. թույլ ոսկորները կարող են առաջացնել ողնաշարի թեքություն, հատկապես, եթե թուլացած ողնաշարում զարգանում են կոմպրեսիոն կոտրվածքներ: Օստեոպորոզն առավել հաճախ հանդիպում է տարեց կանանց և այն մարդկանց մոտ, ովքեր երկար ժամանակ ընդունել են կորտիկոստերոիդներ:
- Միջողնային սկավառակի դեգեներացիա. փափուկ, կլորավուն սկավառակները գործում են որպես բարձիկներ ողնաշարի ողների միջև՝ ապահովելով ողների քիչ շարժունակությունը և ողնաշարի ճկունությունը: Տարիքի հետ այդ սկավառակները հարթվում և փոքրանում են, որը հաճախ վատթարացնում է կիֆոզը:
- Շոյերմանի հիվանդություն. այս հիվանդությունը, որը նաև կոչվում է Շոյերմանի կիֆոզ, սովորաբար սկսվում է ակտիվ աճի ժամանակ, որը տեղի է ունենում մինչև սեռական հասունացումը: Այն ավելի հաճախ հանդիպում է տղա դեռահասների մոտ:
- Այլ խնդիրներ. ողնաշարի ոսկորները, որոնք ճիշտ չեն զարգանում մինչև ծնվելը, կարող են առաջացնել բնածին կիֆոզ: Երեխաների կիֆոզը կարող է նաև կապված լինել որոշակի առողջական վիճակների հետ, ինչպիսին է Էլերս-Դանլոսի համախտանիշը:
Հոդվածը տեղադրվել է՝ 21-03-2021 վերանայվել է՝ 31-03-2023
Հեղինակ
Հեղինակային բոլոր իրավունքները պատկանում են Մեդեքսին։
Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:
