Skip to main content

Ախտանիշներ - Լատեքսից ալերգիա

Եթե ​​ալերգիկ եք լատեքսի նկատմամբ, ապա, ամենայն հավանականությամբ, ախտանշաններ կունենաք լատեքսային ռետինե արտադրանքներին, օրինակ՝ ձեռնոցներին կամ փուչիկներին դիպչելուց հետո:

Դուք նաև կարող եք ախտանիշներ ունենալ, եթե շնչեք լատեքսային մասնիկներ, որոնք օդ են արձակվում, երբ ինչ-որ մեկը ձեր ներկայությամբ հեռացնում է իր լատեքսային ձեռնոցները:

Լատեքսային ալերգիայի ախտանիշները տատանվում են թեթևից մինչև ծանր: Ալերգիկ արձագանքը կախված է նրանից, թե որքան զգայուն եք լատեքսի նկատմամբ և այն լատեքսի քանակից, որի ազդեցությանը դուք ենթարկվում են՝ դիպչում եք կամ ներշնչում եք: Ձեր ալերգիկ ռեակցիան կարող է վատթարանալ լատեքսի յուրաքանչյուր նոր ազդեցության հետ:

Թեթև ախտանիշներ

Թեթև լատեքսային ալերգիայի ախտանիշներից են՝

  • քոր
  • մաշկի կարմրություն
  • եղնջացան կամ ցան:

Ավելի ծանր ախտանիշներ

Դրանք ներառում են՝

  • փռշտոց
  • քթահոսություն
  • քոր եկող, արցունքակալած աչքեր
  • կոկորդում քոր կամ քերծոցի զգացողություն
  • դժվարացած շնչառություն
  • խզզոցներ
  • հազ:

Կյանքին սպառնացող ախտանիշներ․ անաֆիլաքսիա

Լատեքսի նկատմամբ ամենալուրջ ալերգիկ ռեակցիան անաֆիլաքսիան է, որը կարող է մահացու լինել: Անաֆիլակտիկ ռեակցիան զարգանում է բարձր զգայուն մարդկանց մոտ լատեքսի ազդեցությունից անմիջապես հետո: Այնուամենայնիվ, այն հազվադեպ է զարգանում, երբ առաջին անգամ եք ենթարկվում լատեքսի ազդեցությանը:

Անաֆիլաքսիայի ախտանիշները ներառում են՝

  • դժվարաշնչություն
  • եղնջացան կամ այտուց
  • սրտխառնոց և փսխումներ
  • խզզոցներ
  • արյան ճնշման կտրուկ անկում
  • գլխապտույտ
  • գիտակցության կորուստ
  • շփոթվածություն
  • արագացած կամ թույլ անոթազարկ (պուլս):

Ե՞րբ դիմել բժշկին

Դիմեք անհետաձգելի բուժօգնության, եթե ունեք կամ կարծում եք, որ անաֆիլակտիկ ռեակցիա եք տանում:

Եթե ​​լատեքսի ազդեցությունից հետո առաջացել են նվազ ծանրության սուր ռեակցիաներ, խոսեք ձեր բժշկի հետ: Հնարավորության դեպքում դիմեք ձեր բժշկին, երբ ռեակցիա եք դրսևորում: Սա կօգնի ախտորոշմանը:

Հոդվածը հրապարակվել է՝ 13-08-2023
Վերջին վերանայում՝ 05-04-2024