Ախտանիշներ - Լիստերիա

Լիստերոիզով հիվանդացած առողջ մարդիկ կարող են չիմանալ իրենց վարակված լինելու մասին կամ ներկայացնել միայն թույլ գրիպանման կամ գաստրոէնտերին բնորոշ ստամոքսաղիքային ախտանիշներ:

Այնուամենայնիվ, թուլացած իմունիտետով մարդկանց մոտ հիվանդությունը կարող է ստանալ ավելի ծանր ընթացք:

Լիստերիոզը կարող է ընթանալ հետևյալ ախտանիշներով՝

• ջերմություն
• դող և սարսուռ
• մկանային ցավեր
• սրտխառնոց
• փորլուծություն:

Ախտանիշները կարող են սկսվել վարակված սնունդ ուտելուց մի քանի օր անց, սակայն կարող է տևել 30 օր կամ ավելի, մինչև վարակի առաջին գանգատներն ու ախտանիշներն ի հայտ գան:

Եթե լիստերիայի վարակը տարածվում է ձեր նյարդային համակարգի վրա, գանգատներն ու ախտանիշները կարող են ներառել հետևյալը՝

• գլխացավ
• պարանոցային կարկամություն
• շփոթվածություն կամ ուշադրության խանգարումներ
• հավասարակշռության խանգարումներ
• մկանային ցնցումներ (կոնվուլսիաներ):

Ախտանիշները հղիության ընթացքում և նորածինների մոտ

Հղիության ընթացքում լիստերիոզը հավանական է, որ մոր առաջացնի միայն թեթև գանգատներ և ախտանիշներ: Սակայն, նորածնի մոտ կարող են զարգանալ ցավալի հետևանքներ. երեխան կարող է մահանալ արգանդում կամ ծնվելուց մի քանի օրվա ընթացքում ունենալ կյանքին սպառնացող վարակ:

Նորածինների մոտ լիստերիոզի գանգատներն ու ախտանիշները կարող են լինել աննշան, սակայն որոշ դեպքերում կարող են ընթանալ հետևյալ նշաններով՝

• կերակրման նկատմամբ հետաքրքրության կորուստ
• դյուրագրգռություն
• ջերմություն
• փսխում
• շնչառության դժվարացում:

Ե՞րբ դիմել բժշկին

Եթե կերել եք մթերք, որը հետ է կանչվել լիստերիոզի բռնկման պատճառով, հետևեք հիվանդության գանգատներին կամ ախտանիշներին: Եթե ունեք ջերմություն, մկանային ցավեր, սրտխառնոց կամ փորլուծություն, դիմեք ձեր բժշկին: Նույնը վերաբերվում է այն հիվանդություններին, որոնք առաջանում են պոտենցիալ վարակված արտադրանք ուտելուց հետո, ինչպիսիք են ոչ պաստերիզացված կաթով պատրաստված մթերքները կամ վատ տաքացված հոթ-դոգը կամ մսային դելիկատեսները:

Եթե ունեք բարձր ջերմություն, ուժեղ գլխացավ, կարկամված պարանոց, շփոթվածություն կամ լույսի նկատմամբ գերզգայունություն, զանգեք 1-03 և կանչեք շտապ օգնություն: Այս գանգատներն ու ախտանիշները կարող են վկայել բակտերիալ մենինգիտի՝ լիստերիոզի կյանքին սպառնացող բարդության մասին: