Պատճառներ - Երկար QT համախտանիշ

Նորմայում յուրաքանչյուր կծկման ընթացքում ձեր սիրտն արյունն արտամղում է ողջ մարմնով:

Սրտի խոռոչներն արյունն արտամղում են համակարգված կծկումների և թուլացման միջոցով: Սրտի խոռոչների այսպիսի ներդաշնակ աշխատանքը կարգավորվում է սրտով տարածվող էլեկտրական ազդանիշների միջոցով: Յուրաքանչյուր սրտազարկից հետո սրտի էլեկտրական համակարգն ինքնուրույն «վերալիցքավորվում է»՝ պատրաստվելով հաջորդ կծկմանը:

Երկար QT համախտանիշի ժամանակ ձեր սրտամկանի կծկումների միջև վերալիցքավորումը տևում է նորմայից ավելի երկար: Այսպիսի էլեկտրական շեղումը կարող է հայտնաբերվել էլեկտրասրտագրությամբ (ԷՍԳ) որպես երկարացած QT միջակայքով:

Ժառանգական երկար QT համախտանիշ

Առնվազն 17 գեն կապված են այս հիվանդության հետ և մինչ օրս հայտնաբերվել են դրանց հարյուրավոր մուտացիաներ: Այնուամենայնիվ, երկար QT համախտանիշով մարդկանց մոտ 20%-ի մոտ գենետիկ թեստով կարող է ստացվել բացասական պատասխան:

Բժիշկներն առանձնացնում են բնածին երկար QT համախտանիշի երկու տարատեսակ՝

• Ռոմանո-Վորդի համախտանիշ, որն ավելի հաճախ հանդիպող և միայն մեկ ծնողից ժառանգվող տարատեսակն է
• Ժերվելի և Լանգե-Նիլսենի համախտանիշ, որն ավելի հազվադեպ հանդիպող, երկու ծնողից ժառանգվող և ավելի ծանր ընթացքով տարատեսակն է և ուղեկցվում է բնածին խլության հետ:

Ձեռք բերովի երկար QT համախտանիշ

Ձեռք բերովի երկար QT համախտանիշը կարող է պատճառվել որոշ դեղերից, էլեկտրոլիտային շեղումներից (օրինակ՝ ցածր արյան կալիում կամ հիպոկալեմիա) կամ որոշ առողջական խնդիրներից:

Ավելի քան 100 դեղեր, որոնց մեծ մասը լայնորեն օգտագործվում են, կարող են առողջ մարդկանց մոտ երկարացնել QT միջակայքը: Նման վիճակը կոչվում է դեղով պատճառված երկար QT համախտանիշ:

QT միջակայքը երկարացնող և սրտի ռիթմի խանգարում առաջացնող դեղերից են՝

• որոշ հակաբիոտիկներ
• որոշ հակադեպրեսանտներ և հակափսիխոտիկ դեղեր
• որոշ հակահիստամինային դեղեր
• կալիում հեռացնող միզամուղներ
• սրտի նորմալ ռիթմը պահպանող դեղեր (հակաառիթմիկներ)
• որոշ հակասրտխառնոցային դեղեր:

Սովորաբար երկար QT համախտանիշ առաջանում է այն մարդկանց մոտ, ովքեր ունեն որոշակի գենետիկ մուտացիաներ:

Ռիսկի գործոններ

Երկար QT համախտանիշի զարգացման ռիսկը բարձրանում է հետևյալ խմբերում՝

• անբացատրելի ուշագնացությամբ, ջրախեղդման կամ այլ պատահարներով երեխաներ, դեռահասներ կամ երիտասարդ չափահասներ
• նրանց ընտանիքի անդամներ
• հաստատված երկար QT համախտանիշով անձանց անմիջական հարազատներ
• QT միջակայքը երկարացնող դեղեր ընդունող անձինք
• արյան կալիումի, մագնեզիումի կամ կալցիումի ցածր մակարդակով անձինք, օրինակ՝ նյարդային անորեքսիայով հիվանդներ: