Ախտանիշներ - Երկար QT համախտանիշ

Երկար QT համախտանիշով բազմաթիվ մարդիկ որևէ գանգատ չեն ներկայացնում:

Նման դեպքերում հիվանդությունը կարող է հայտնաբերվել՝

• պատահականորեն՝ էլկտրասրտագրությամբ (ԷՍԳ)
• երկար QT համախտանիշի վերաբերյալ ընտանեկան պատմությամբ (անամնեզ)
• գենետիկ թեստի արդյունքներով:

Որոշ մարդկանց մոտ հիվանդությունը կարող է ուղեկցվել հետևյալ ախտանիշներով՝

• ուշագնացություն (սինկոպե), որն ի հայտ է գալիս սրտի ժամանակավոր կտրուկ առիթմիայի պատճառով՝ առաջացած զայրույթից, վախից, ֆիզիկական լարվածությունից, սուր սթրեսից (օրինակ՝ հեռախոսի հանկարծակի զանգ), և առիթմիային կարող են նախորդել աչքերի դեմը սևանալը, թուլությունը, տեսողության մթագնումը և գլխապտույտը
• ցնցումներ, որի պատճառը սուր առիթմիայի պայմաններում գլխուղեղի արյունամատակարարման կտրուկ նվազումն է և թթվածնային քաղցը
• հանկարծամահություն, որը երբեմն կարող է զարգանալ բուժումից դուրս մնացած դեպքերում:

Երկար QT համախտանիշի վերոնշյալ ախտանիշները կարող են զարգանալ նաև քնած ժամանակ կամ արթնանալիս:

Ե՞րբ դիմել բժշկին

Խորհրդակցեք ձեր բժշկի հետ, եթե ֆիզիկական ծանրաբեռնվածության կամ հուզական սթրեսի ժամանակ, նոր (հատկապես՝ անծանոթ կամ QT միջակայքի երկարացում առաջացնող) դեղեր ընդունելիս ձեզ մոտ ի հայտ է եկել հանկարծակի ուշաթափություն: Խոսեք նաև ձեր բժշկի հետ, եթե ունեք հաստատված երկար QT համախտանիշով ընտանիքի անդամ: