Մագնեզիում - Լաբորատոր թեստեր

Մագնեզիումը մետաղ է, որի քիչ քանակներն առկա են ձեր օրգանիզմի յուրաքանչյուր բջջում։

Ի՞նչն են հետազոտում

Մագնեզիումը կենսական դեր ունի ձեր օրգանիզմի տարբեր գործընթացներում, օրինակ՝

• սննդից էներգիայի առաջացում
• մկանների և նյարդերի պատշաճ գործունեության ապահովում
• բջիջների կողմից կալիումի և կալցիումի ներծծում։

Ձեր օրգանիզմի մագնեզիումի մեծ մասը ստացվում է սննդով։ Մագնեզիումով հարուստ սննդամթերքներից են կանաչատերև բանջարեղենները (օրինակ՝ սպանախ), ընկույզներն ու սերմերը, չթեփազերծված հատիկավորները, լոբազգիները, ձիթապտուղը, ոլոռը և որոշ փափկամորթեր։

Մագնեզիումի գրեթե կեսը պահեստավորված է ձեր ոսկորներում, իսկ մնացածը՝ այլ հյուսվածքներում։ Ձեր օրգանիզմի ամբողջ մագնեզիումի 100 մասից միայն 1-ն է առկա արյան մեջ։

Բազմաթիվ մարդիկ մագնեզիումի պահանջվող քանակները ստանում են սննդի միջոցով, ուստի, մինչև մագնեզիումական որևէ հավելում ընդունելը զրուցեք ձեր բժշկի հետ։

Ինչո՞ւ է այս թեստը նշանակվում

Ձեր բժիշկը կարող է ցանկանալ ստուգել ձեր արյան մագնեզիումը, եթե դուք՝

• չարաշահում եք ալկոհոլ
• ունեք սնման խանգարում կամ վատ եք սնվում
• ունեք դիաբետ
• ունեք երիկամային որևէ խնդիր
• ստանում եք մագնեզիումի կամ կալցիումի հավելումներ
• ունեք արյան խիստ բարձր կամ խիստ ցածր կալցիում կամ կալիում։

Արյան մեջ մագնեզիումի անբավարար քանակության նշաններն ու ախտանիշներն են՝

• հոգնածություն
• սրտխառնոց և փորլուծություն
• մկանային թուլություն, ջղաձումներ կամ կծկանքային ցավեր
• խիստ գրգռված վիճակ
• անկանոն սրտազարկ (առիթմիա)
• մարմնի քաշի կորուստ
• ցնցումներ։

Արյան մագնեզիումի ցածր մակարդակը կարող է նշանակել, որ՝

• դուք ձեր սննդով չեք ստանում մագնեզիումի բավարար քանակներ
• ձեր աղիքները չեն ներծծում բավարար չափով մագնեզիում
• ձեր երիկամները հեռացնում են մագնեզիումի մեծ քանակներ։

Ինչպե՞ս նախապատրաստվել այս թեստին

Մագնեզիումի լաբորատոր թեստը որևէ առանձնահատուկ պայման կամ պահանջ չունի: Ամեն դեպքում, մինչև արյունը հանձնելը զրուցեք ձեր բժշկի հետ:

Ձեր արդյունքների մեկնաբանումը

Ինչպես որևէ այլ հետազոտության, այնպես էլ մագնեզիումի թեստի արդյունքները պետք է քննարկել ձեր բժշկի հետ։

Եթե հղի եք, ձեր արյան մագնեզիումի մակարդակը կարող է բնականոն կերպով 2-3-րդ ամիսներին իջնել։ Այնուամենայնիվ, անկախ այն բանից՝ հղի եք, թե ոչ, եթե արյան թեստով ստացվում է մագնեզիումի նորմալ միջակայքից դուրս գտնվող ցուցանիշ, նման վիճակը կարող է վկայել առողջական խնդրի մասին։

Լրացուցիչ տեղեկատվություն

Մագնեզիումի թեստի մասին

Այցելեք մեր կայքի Մեդեքս-Lab բաժինը, որպեսզի իմանաք մագնեզիում թեստի մասին ավելի մանրակրկիտ տեղեկություններ։

Արյան թեստի մասին

Կարդացեք Մեդեքս-Health բաժնի արյան թեստերի ուղեցույցը, որպեսզի ընդհանուր տեղեկություններ իմանաք արյան թեստերի մասին, այդ թվում՝

• ինչի՞ մասին հոգ տանել մինչև լաբորատորիա այցելելը
• ի՞նչ է տեղի ունենում արյան հետազոտության ընթացքում
• ինչպիսի՞ ճշգրություն ունեն հետազոտության արդյունքները։