Պատճառներ - Նիկոտինամոլություն

​Նիկոտինը ծխախոտում պարունակվող քիմիական նյութն է, որը ստիպում է ձեզ շարունակել ծխելը:

Նիկոտինը գլխուղեղ է հասնում ծուխը ներս քաշելուց վայրկյանների ընթացքում: Գլխուղեղում նիկոտինը մեծացնում է նեյրոհաղորդիչներ (նեյրոմեդիատորներ) կոչվող քիմիական նյութերի արտազատումը, որոնք օգնում են տրամադրությանը և վարքի կարգավորմանը:

Դոպամինը՝ այս նեյրոհաղորդիչներից մեկը, ազատվում է գլխուղեղի այսպես կոչված պարգևատրման կենտրոնում և առաջացնում է հաճույքի զգացում և բարելավված տրամադրություն:

Որքան շատ եք ծխում, այնքան ավելի շատ նիկոտին է պետք ձեզ լավ զգալու համար: Նիկոտինը արագորեն դառնում է ձեր առօրյայի մի մասը և միահյուսվում ձեր սովորությունների և զգացմունքների հետ:

Ընդհանուր իրավիճակները, որոնք խթանում են ծխելու ցանկությունը, ներառում են՝

• սուրճ խմելը կամ աշխատավայրում ընդմիջումներ անելը
• հեռախոսով խոսելը
• ալկոհոլ խմելը
• ավտոմեքենա վարելը
• ընկերների հետ ժամանակ անցկացնելը:

Նիկոտինից ձեր կախվածությունը հաղթահարելու համար դուք պետք է իմանաք ձեր հրահրող գործոնների` տրիգերների մասին և պլան կազմեք դրանց դեմ պայքարելու համար:

Ռիսկի գործոններ

Յուրաքանչյուր ոք, ով ծխում է կամ օգտագործում է ծխախոտի այլ տեսակներ, կախվածության մեջ է: Ծխախոտ օգտագործելու վրա ազդող գործոնները ներառում են հետևյալը:

• Տարիք. մարդկանց մեծամասնությունը սկսում է ծխել մանկության կամ պատանեկության տարիներին: Ծխելը սկսելիս որքան երիտասարդ լինեք, այնքան ավելի մեծ է կախվածություն ձեռք բերելու հավանականությունը:
• Գենետիկա. հավանականությունը, որ դուք կսկսեք ծխել և կշարունակեք ծխելը, կարող է մասամբ ժառանգական լինել: Գենետիկական գործոնները կարող են ազդել այն բանի վրա, թե ինչպես են ձեր ուղեղի նյարդային բջիջների ընկալիչները արձագանքում ծխախոտի միջոցով ստացվող նիկոտինի բարձր քանակներին:
• Ծնողներ և հասակակիցներ. այն երեխաները, ովքեր մեծանում են ծխող ծնողների հետ, ավելի հավանական են դառնում ծխող: Ծխող ընկերներ ունեցող երեխաները նույնպես ավելի հավանական է, որ դա փորձեն:
• Դեպրեսիա կամ այլ հոգեկան հիվանդություն. մի շարք հետազոտություններ ցույց են տալիս դեպրեսիայի և ծխելու միջև գործող կապը: Մարդիկ, ովքեր ունեն դեպրեսիա, շիզոֆրենիա, հետտրավմատիկ սթրեսային խանգարում կամ հոգեկան հիվանդության այլ ձևեր, ավելի հավանական է, որ ծխող լինեն:
• Այլ հոգեներգործուն նյութերի օգտագործում. մարդիկ, ովքեր չարաշահում են ալկոհոլը և ապօրինի թմրանյութերը, ավելի հավանական է, որ ծխող լինեն: