Պատճառներ - Oպտիկ նևրիտ

Տեսողական նևրիտի հստակ պատճառը անհայտ է: Ենթադրվում է, որ այն զարգանում է, երբ իմունային համակարգը սխալմամբ թիրախավորում է ձեր տեսողական նյարդը ծածկող հյուսվածքը (միելին), որն էլ հանգեցնում է բորբոքման և միելինի վնասման:

Նորմայում միելինն օգնում է, որ էլեկտրական ազդանիշներն արագ տեղափոխվեն աչքից դեպի գլխուղեղ, որտեղ այդ ազդանիշները վերածվում են տեսողական տեղեկատվության: Տեսողական նևրիտը խաթարում է այս գործընթացը՝ որպես հետևանք ազդելով տեսողության վրա:

Հետևյալ աուտոիմուն հիվանդությունները հաճախ կապված են տեսողական նևրիտի հետ:

• Ցրված սկլերոզ. այս հիվանդության դեպքում ձեր աուտոիմուն համակարգը գրոհում և վնասում է գանգուղեղային նյարդային մանրաթելերը ծածկող միելինային թաղանթը: Տեսողական նևրիտ ունեցող մարդկանց մոտ հիվանդության մեկ դրվագից հետո կյանքի ընթացքում ցրված սկլերոզի զարգացման ռիսկը կազմում է մոտ 50%: Տեսողական նևրիտից հետո ցրված սկլերոզի զարգացման ռիսկն ավելի է մեծանում, եթե մագնիսա-ռեզոնանսային տոմոգրաֆիան (ՄՌՏ) ձեր գլխուղեղում հայտնաբերում է ուղեղանյութի ախտահարումներ:
• Տեսողական նեյրոմիելիտ (նեյրոմիելիտ օպտիկա)․ այս հիվանդությունն ընթանում է տեսողական նյարդի և ողնուղեղի բորբոքմամբ: Տեսողական նեյրոմիելիտն ունի ցրված սկլերոզի հետ նմանություններ, սակայն առաջինը չի ախտահարում գանգուղեղային նյարդերը, ինչը հաճախ հայտնաբերվում է ցրված սկլերոզով մարդկանց մոտ: Այնուամենայնիվ, տեսողական նեյրոմիելիտն ունի ավելի ծանր ընթացք, քան ցրված սկլերոզը՝ հաճախ հանգեցնելով սրացումից հետո վերականգնման ավելի վատ արդյունքների:
• Միելինային օլիգոդենդրոցիտային գլիկոպրոտեինային (ՄՕԳ) հակամարմինային խանգարում․ այս վիճակը կարող է առաջացնել տեսողական նյարդի, ողնուղեղի կամ գլխուղեղի բորբոքում: Ցրված սկլերոզի և տեսողական նեյրոմիելիտի նման, կարող են առաջանալ բորբոքման կրկնվող սրացումներ: ՄՈԳ սրացումներից հետո վերականգնումը սովորաբար ավելի բարենպաստ է, քան տեսողական նեյրոմիելիտից:

Երբ տեսողական նևրիտի ախտանիշներն ավելի բարդ են, պետք է քննարկվի այլ փոխկապված պատճառների հնարավորությունը:

• Վարակներ. բակտերիալ վարակները, ներառյալ Լայմի հիվանդությունը, կատվի քերծվածքի տենդը և սիֆիլիսը, կամ վիրուսները, ինչպիսիք են կարմրուկը, խոզուկը և հերպեսը, կարող են առաջացնել տեսողական նևրիտ:
• Այլ հիվանդություններ. սարկոիդոզը, Բեհչետի հիվանդությունը և համակարգային կարմիր գայլախտը (լուպուս), կարող են առաջացնել կրկնվող տեսողական նևրիտ:
• Դեղամիջոցներ և թույներ (տոքսիններ). որոշ դեղամիջոցներ և թույներ կապված են տեսողական նևրիտի զարգացման հետ: Էթամբուտոլը, որն օգտագործվում է տուբերկուլոզի բուժման համար, և մեթանոլը, որն անտիֆրիզի, ներկերի և լուծիչների ընդհանուր բաղադրիչ է, կապված են այս խնդրի հետ:

Ռիսկի գործոններ

Տեսողական նևրիտի զարգացման ռիսկի գործոնները ներառում են հետևյալը:

• Տարիք. տեսողական նևրիտն առավել հաճախ ախտորոշվում է 20-ից 40 տարեկան չափահասների մոտ:
• Սեռ. հիվանդության զարգացումնը շատ ավելի հավանական է կանանց, քան տղամակարդկանց մոտ:
• Ռասա. սպիտակամորթների շրջանում տեսողական նևրիտն ավելի տարածված է:
• Գենետիկ մուտացիաներ. որոշ գենետիկ մուտացիաներ կարող են մեծացնել օպտիկական նևրիտի կամ ցրված սկլերոզի զարգացման ռիսկը: