Պատճառներ - Պրիապիզմ

Էրեկցիան սովորաբար առաջանում է ի պատասխան ֆիզիկական կամ հոգեբանական խթանման:

Այս գրգռումը հանգեցնում է առնանդամի որոշակի հարթ մկանների թուլացման՝ մեծացնելով արյան հոսքը դեպի առնանդամի սպունգանման հյուսվածքներ: Արդյունքում, արյունով լցված առնանդամը դառնում է պնդացած, որը կոչվում է էրեկցիա։ Գրգռման ավարտից հետո արյունը դուրս է հոսում, և առնանդամը վերադառնում է իր սովորական՝ ոչ պինդ (թուլացած) վիճակին:

Պրիապիզմն առաջանում է, երբ այս համակարգի մի մասը՝ արյունը, անոթները, հարթ մկանները կամ նյարդերը, փոխում են արյան նորմալ հոսքը, և էրեկցիան շարունակաբար պահպանվում է: Պրիապիզմի հիմքում ընկած պատճառը հաճախ չի կարող որոշվել, սակայն մի շարք հիվանդություններ կամ վիճակներ կարող են դեր խաղալ:

Արյան հիվանդություններ

Արյան հետ կապված հիվանդությունները կարող են նպաստել պրիապիզմին, սովորաբար՝ իշեմիկ պրիապիզմին, երբ արյունը չի կարողանում դուրս հոսել առնանդամից: Այս խանգարումներից են՝

• մանգաղաբջջային հիվանդություն
• լեյկոզ (լեյկեմիա)
• արյան այլ հիվանդություններ (հեմատոլոգիական դիսկրազիաներ), ինչպիսիք են թալասեմիան և ցրված միելոման:

Երեխաների մոտ պրիապիզմի հետ կապված ամենատարածված ախտորոշումը մանգաղաբջջային հիվանդությունն է:

Դեղամիջոցներ

Պրիապիզմ, սովորաբար՝ իշեմիկ պրիապիզմ, կարող է զարգանալ որպես բազմաթիվ դեղամիջոցների կողմնակի ազդեցություն: Նման դեղամիջոցների օրինակներից են՝

• էրեկտիլ դիսֆունկցիայի բուժման համար ուղղակիորեն առնանդամի մեջ ներարկվող դեղամիջոցներ, ինչպիսիք են Ալպրոստադիլը (Կավերյեկտ, Էդեքս և այլն), Պապավերինը, Ֆենտոլամինը (Օրավերսե) և այլն
• հակադեպրեսանտներ, ինչպիսիք են Ֆլուոքսետինը (Պրոզակ), Բուպրոպիոնը (Ուելբուտրին XL, Ուելբուտրին SR), Տրազոդոնը և Սերտրալինը (Զոլոֆտ)
• ալֆա-բլոկերներ, այդ թվում՝ Պրազոսին (Մինիպրես), Տերազոսին, Դոքսազոսին (Կարդուրա) և Տամսուլոսին (Ֆլոմաքս)
• տագանապի և փսիխոտիկ խանգարումների բուժման դեղամիջոցներ, ինչպիսիք են Հիդրօքսիզինը (Վիստարիլ), Ռիսպերիդոն (Ռիսպերդալ), Օլանզապինը (Զիպրեքսա), Լիթիումու (Լիթոբիդ), Կլոզապինը (Կլոզարիլ), Քլորպրոմազինը և Թիոռիդազինը
• արյունը նոսրացնող (ջրիկացնող) դեղամիջոցներ, որոնք նաև կոչվում են հակամակարդիչներ (անտիկոագուլյանտներ), օրինակ՝ Վարֆարին (Յանտովեն) և Հեպարին
• հորմոններ, ինչպիսիք են Տեստոստերոնը կամ Գոնադոտրոպին-ազատող հորմոնը
• ուշադրության պակասի/գերակտիվության խանգարման բուժման դեղամիջոցներ, ինչպիսիք են Մեթիլֆենիդատը (Կոնցերտա, Ռիտալին և այլն) և Ատոմոքսեինտը (Ստրատերա):

Ալկոհոլի և թմրամիջոցների օգտագործում

Ալկոհոլը, մարիխուանան, կոկաինը և այլ թմրամիջոցները կարող են առաջացնել պրիապիզմ, մասնավորապես՝ իշեմիկ պրիապիզմ:

Վնասվածք

Ոչ իշեմիկ պրիապիզմի տարածված պատճառն առնանդամի, կոնքի կամ առնանդամի հիմքի և հետանցքի միջև ընկած հատվածի (շեքի) տրավման է կամ վնասվածքը:

Այլ գործոններ

Պրիապիզմի այլ պատճառները ներառում են հետևյալը՝

• սարդի, կարիճի խայթոց կամ այլ թունավոր վարակներ
• նյութափոխանակության խանգարումներ, այդ թվում՝ պոդագրա և ամիլոիդոզ
• նյարդածին խանգարումներ, օրինակ՝ ողնուղեղի վնասվածք կամ սիֆիլիս
• առնանդամը ներառող քաղցկեղներ