Պատճառներ - Մաշկի ցան

Գոյություն ունեն մաշկի ցանավորման բազմաթիվ հնարավոր պատճառներ, այդ թվում՝ ալերգիաներ, հիվանդություններ, ռեակցիաներ և դեղամիջոցներ:

Ցանը նաև կարող է պատճառվել բակտերիալ, սնկային, վիրուսային կամ մակաբուծային վարակներով: Ընդ որում, ցանը կարող է դրսևորվել որպես ոչ միայն մաշկային, այլև արտամաշկային կամ ընդհանուր հիվանդությունների ախտանիշ: Դեղերը, քրոնիկ հիվանդությունները կամ ալերգիկ ռեակցիաները, ինչպիսին է եղնջացանը, ցանի բազմաթիվ պատճառների օրինակներից են:

Կոնտակտային դերմատիտ

Ցանի ամենատարածված պատճառներից մեկը կոնտակտային դերմատիտն է, որը զարգանում է, երբ մաշկը ռեակցիա է դրսևորում արտաքին գործոնի հետ ուղղակի շփման հետևանքով: Նման դեպքերում մաշկը կարմրում և բորբոքվում է, իսկ որոշ դեպքերում՝ ջրակալում։

Կոնտակտային դերմատիտի հիմնական պատճառներից են՝

• հագուստի (կտորի) գունանյութեր
• կոսմետիկ ապրանքներ
• թունավոր բույսեր, օրինակ՝ թունավոր բաղեղ և եղինջ
• քիմիական նյութեր, օրինակ՝ լատեք կամ ռետին:

Իմացե՛ք ավելին կոնտակտային դերմատիտի մասին:

Դեղամիջոցներ

Որոշ դեղամիջոցներ տարբեր մարդկանց մոտ կարող են առաջացնել ցան որպես կողմնակի ազդեցություն կամ ալերգիկ ռեակցիա: Ավելին, որոշ դեղամիջոցներ, այդ թվում՝ հակաբիոտիկները կարող են պատճառել լուսազգայունություն, երբ անձն արևի ճառագայթների նկատմամբ դառնում է խոցելի: Լուսազգայունության ռեակցիան արտաքինից նմանվում է արևայրուքին:

Վարակներ

Բակտերիալ, վիրուսային կամ սնկային վարակները նույնպես կարող են առաջացնել ցան: Այս ցաները կախված են վարակի տեսակից: Օրինակ, տարածված սնկային վարակ հանդիսացող կանդիդոզը (կաթնախտ) կարող է առաջացնել մաշկային ծալքերում քոր առաջացնող ցան:

Աուտոիմուն հիվանդություններ

Աուտոիմուն խանգարումը զարգանում է, երբ իմունային համակարգը սկսում է վնասել սեփական առողջ հյուսվածքները: Կան բազմաթիվ աուտոիմուն հիվանդություններ, որոնց մի մասը կարող է ընթանալ ցանով: Օրինակ, համակարգային կարմիր գայլախտը (լուպուս) օրգանիզմի բազմաթիվ համակարգերի, այդ թվում՝ մաշկի վրա ազդող հիվանդություն է, որը քթի և այտերի վրա առաջացնում է թիթեռնիկի նմանվող էրիթեմատոզ ցան: