Գրադարան

Գոտևորող որքին. ախտանիշներ

Գոտևորող որքին. ախտանիշներ

Time Read 2 րոպե

Գոտևորող որքինի կամ գոտևորող հերպեսի (հերպես զոստերի) ախտանիշները սովորաբար ընդգրկում են ձեր մարմնի մի կողմի միայն փոքր հատվածը (գոտի)։

Այս ախտանիշները կարող են ներառել՝

  • ցավ, այրոց կամ ծակծկոց
  • հպման նկատմամբ բարձր զգայնություն
  • կարմիր հանգուցավոր ցան (էրիթեմային բծեր), որը սկսվում է ցավից մի քանի օր անց
  • հեղուկով լցված բշտիկներ, որոնք բացվում են և վերածվում կեղևակալած էրոզիաների
  • քոր:

Որոշ մարդիկ նաև ունենում են՝

  • ջերմություն
  • գլխացավ
  • լույսի նկատմամբ բաձր զգայնություն
  • հոգնածություն:

Ցավը սովորական գոտևորող որքինի առաջին ախտանիշն է: Որոշ մարդկանց մոտ ցավը կարող է ուժեղ լինել: Կախված ցավի տեղակայումից, երբեմն այն կարող է շփոթվել սրտի, թոքերի կամ երիկամների հետ կապված խնդիրների հետ: Որոշ մարդիկ զգում են հերպետիկ ցավ՝ առանց երբևէ ցան առաջանալու:

Առավել հաճախ, հերպետիկ ցանը զարգանում է որպես բշտիկների շերտագիծ, որը պտտվում է իրանի ձախ կամ աջ կողմում: Երբեմն հերպետիկ ցանը հայտնվում է մեկ աչքի շուրջ կամ պարանոցի կամ դեմքի մի կողմում:

Ե՞րբ դիմել բժշկին

Հնարավորինս շուտ դիմեք ձեր բժշկին, եթե կասկածում եք գոտևորող որքին, հատկապես հետևյալ իրավիճակներում:

  • Ցավն ու ցանն առաջանում են աչքի մոտ։ Եթե չբուժվի, այս վարակը կարող է հանգեցնել աչքի անդառնալի վնասման:
  • Դուք 50 և ավելի տարեկան եք: Տարիքը մեծացնում է բարդությունների ռիսկը։
  • Դուք կամ ձեր ընտանիքից որևէ մեկը թուլացած իմունային համակարգ ունեք: Սա կարող է պայմանավորված լինել քաղցկեղով, դեղամիջոցներով կամ քրոնիկ հիվանդություններով:
  • Ցանը տարածված է և ցավոտ։

Հոդվածը տեղադրվել է՝ 11-05-2018 վերանայվել է՝ 27-04-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով