Գոտևորող որքինի և գոտևորող հերպեսի (հերպես զոստերի) բուժմանը զուգահեռ կարող եք ինքներդ նպաստել ախտանիշների մեղմացմանը:
Օրինակ, սառը լոգանք ընդունելը կամ բշտիկների վրա սառը թրջոցների օգտագործումը կարող է օգնել քորի ու ցավի մեղմացմանը: Եվ, եթե հնարավոր է, փորձեք նվազեցնել ձեր կյանքում սթրեսի չափը:
Օգտակար կարող են լինել նաև այս խորհուրդները, որոնք կօգնեն նաև վիրուսի տարածման կանխարգելմանը:
- Մաշկի ցանավորված շրջանները պահեք հնարավորինս չոր և մաքուր:
- Մի փորձեք ձեռքերով կամ այլ կերպ բացել հերպեսային բշտերը կամ հեռացնել չորացած բշտերի կեղևները: Այս ձևով դուք կնպաստեք բակտերիալ վարակի ավելացմանը և վերքերի սպիական փոփոխություններին:
- Լոգանքից կամ ցնցուղից հետո փաթաթեք ձեր մարմինը փափուկ մաքուր սրբիչով: Մի փորձեք տրորել ձեր մաշկը, հատկապես ցանավորման շրջանում:
- Խուսափեք սրբիչների (այդ թվում՝ լոգարանի սրբիչի) համատեղ օգտագործումից:
- Աշխատեք, որ ձեր մաշկի ախտահարված շրջաններին հպվեն միայն փափուկ բամբակե շորեր: «Ջրոտ» ցանը կարող եք փակել վերքերին չկպչող ստերիլ վիրակապով:
- Բացված բշտիկների դեպքում մի՛ օծեք դրանք որևէ քսուքով կամ գելով, հակառակ դեղպքում կարող եք մեծացնել երկրորդային բակտերիալ վարակման հնարավորությունը:
- Օգտագործված սրբիչները պետք է լվանալ տաք ջրով:
- Ցանավորում ունենալիս խուսափեք բարձր ռիսկի մարդկանց հետ շփվելուց՝ ջրծաղիկի պատվաստում չստացած հղիներ, թույլ իմունային համակարգով կամ մեծ տարիքով մարդիկ և մինչև 1 ամսական նորածիներ:
- Խուսափեք անմիջական մաշկային շփում պահանջող խաղերից և լողավազաններից:
Հոդվածը հրապարակվել է՝ 11-05-2018
Վերջին վերանայում՝ 22-04-2024