Մաշկային ստաֆիլոկոկ - Վարակներ

Մաշկի ստաֆիլոկոկային վարակները ներառում են մի շարք վարակներ, որոնք ախտահարում են մաշկը։

Բազմաթիվ մարդիկ իրենց մաշկի վրա կամ քթի խոռոչում ունեն ստաֆիլոկոկային բակտերիաներ, սակայն դրանք սովորաբար առողջական որևէ խնդիր չեն առաջացնում։ Մաշկի ստաֆիլոկոկային վարակը զարգանում է, երբ այս բակտերիաները թափանցում են մաշկի մեջ և ախտահարում այն։

Մաշկի ստաֆիլոկոկային վարակների ախտանիշները

Մաշկի ստաֆիլոկոկային վարակների ախտանիշները կարող են լինել փոփոխական՝ սկսած թույլից մինչև ծանր։

Վերքային վարակներ

Ցանկացած տիպի վերք, լինի կտրված թե քերծված, կարող է վարակվել ստաֆիլոկոկային բակտերիաներով։ Դուք կարող եք կասկածել, որ ձեր վերքը ստաֆիալոկոկով վարակված է, եթե վերքը՝

• կարմրած է, այտուցված և ցավոտ
• արտադրում է թարախ կամ հեղուկ, որը կարող է լինել մեղրագույն և առաջացնել կեղև
• ապաքինվում է սովորականից ավելի երկարաձգված
• ունի տհաճ հոտ։

Ֆուրունկուլ

Սա ստաֆիլոկոկային վարակի ամենատարածված տեսակն է: Այն ախտահարում է մաշկի մազապարկիկները (ֆոլիկուլ) կամ ճարպագեղձերը` առաջացնելով թարախաբշտիկ: Ֆուրունկուլը մաշկը դարձնում է կարմիր և այտուցված: Թարախաբշտիկը բացվելիս թարախն արտահոսում է: Առավել հաճախ ֆուրունկուլ առաջանում է թևատակերում կամ աճուկի կամ հետույքի շուրջ:

Իմացե՛ք ավելին ֆուրունկուլի մասին:

Իմպետիգո

Իմպետիգոն մանկահասակ և դպրոցական տարիքի երեխաների շրջանում շատ տարածված և խիստ վարակիչ մաշկային վարակ է։

Ձեր երեխան կարող է ունենալ իմպետիգո, եթե նրա մաշկի վրա հայտնվել են քոր հարուցող վերքեր կամ բշտիկներ, որոնց պատռվելուց հետո առաջանում են դեղնավուն կամ շագանակագույն կեղևներ։

Իմպետիգոյի ցանը կարող է առաջանալ մարմնի բոլոր շրջաններում, սակայն ավելի հաճախ լինում է քթի և բերանի շրջակայքում։

Ցելյուլիտ

Ցելյուլիտը (cellulitis) մաշկի և ենթամաշկային հյուսվածքների տարածվող բորբոքումն է։ Այն չպետք է շփոթել մաշկի անհարթության հետ (cellulite), որը նույնպես հնչում է ցելյուլիտ: Ցելյուլիտի դեպքում առաջանում է հակաբիոտիկային բուժման անհրաժեշտւթյուն։ Դուք կարող եք կասկածել ցելյուլիտ ունենաու մասին, եթե գանգատվում եք սրտխառնոցից, դողից ու սարսուռից և ձեր մաշկի ախտահարված շրջանը դարձել է՝

• կարմիր
• հպվելիս կամ առանց հպվելու՝ ցավոտ
• հպվելիս՝ տաք
• այտուցված։

Իմացե՛ք ավելին ցելյուլիտի մասին:

Մաշկի ստաֆիլոկոկային ախտահարման համախտանիշ

Մաշկի ստաֆիլոկոկային ախտահարման համախտանիշն ամենածանր մաշկի ստաֆիլոկոկային վարակն է։ Այն սովորաբար հանդիպում է մինչև 5 տարեկան մանուկների մոտ և զարգանում է, երբ ստաֆիլոկոկներն արտադրում են մաշկն ախտահարող թույն (տոքսին)։ Նման դեպքերում մաշկը ստանում է եռման ջրով այրված լինելու տեսք։

Ձեր երեխան կարող է ունենալ այս վարակը, եթե նրա ինքնազգացողությունը վատացել է և՝

• ջերմում է 38° C և ավելի բարձր
• մաշկը հպվելիս խիստ ցավոտ է
• մաշկն ունի այրված տեսք կամ շերտազատվում է։

Ե՞րբ դիմել բժշկին

Եթե կասկածում եք, որ ունեք ստաֆիլոկոկային ծագման մաշկային լուրջ վարակ, կարևոր է, որ հնարավորինս շուտ կապ հաստատեք ձեր բժշկի հետ։ Ծանր վարակների դեպքում բուժումը կարող է անցկացվել հիվանդանոցում։

Մաշկի ստաֆիլոկոկային վարակների բուժումը

Այս վարակների մեծ մասը բուժվում է հակաբիոտիկներով։

Հասարակ վարակները կարող են բուժվել տնային պայմաններում, մինչդեռ ծանր դեպքերի բուժումը պետք է կազմակերպվի հիվանդանոցային պայմաններում։ Երկրորդ դեպքում կարող է առաջանալ ներերակային հակաբիոտիկների և այլ դեղերի նշանակման կարիք։ Կարևոր է այնպիսի պայմանների ապահովելը, որ ստաֆիլոկոկային վարակը չտարածվի և չվարակի այլ մարդկանց։

Ինչպե՞ս խուսափել մաշկի ստաֆիլոկոկային վարակներից

Մեծամասամբ դուք կարող եք խուսափել այս վարակներից, եթե պահպանեք անձնական և ընդհանուր հիգիենայի կանոնները։ Կանոնավոր կերպով լավ լվացեք ձեր ձեռքերը հոսող մաքուր ջրով, օգտագործեք օճառ և չորացրեք ձեռքերը մաքուր սրբիչով կամ միանգամյա օգտագործման թղթե սրբիչով։

Եթե ապրում եք մաշկի ստաֆիլոկոկային վարակ ունեցող մարդու հետ միասին, կարող եք խուսափել այս վարակից, եթե համատեղ չօգտագործեք անձնական օգտագործման իրերն ու պարագաները, օրինակ՝ ատամի խոզանակներ, սրբիչներ, հագուստ և սպիտակեղեն, ամեն օր տաք ջրով և սպիտակեցնող հեղուկով լվանաք ձեր սպիտակեղենը և սրբիչները և անմիջապես լվանաք ձեր ձեռքերն այդ մարդու հետ ուղղակի շփվելուց հետո։

Իմպեդիգոյով երեխաները պետք է բաց թողնեն մսուր-մանկապարտեզ, նախակրթարան կամ դպրոց հաճախելը, քանի դեռ հակաբիոտիկային բուժումը սկսելուց հետո 48 ժամ չի անցել, որից հետո «արգելքը» կարելի է հանել, եթե նրանց վերքերը փակված են անջրաթափանց վիրակապով։