Տեստոստերոնն արտադրվում է ինչպես տղամարդկանց, այնպես էլ կանանց օրգանիզմում, սակայն տղամարդկանց մոտ այս հորմոնի քանակներն անհամեմատ ավելի մեծ են, քան կանանց մոտ:

Արյան տեստոստերոնի թեստը թույլ է տալիս ստուգել, թե ինչքան է այս կարևոր արական սեռական հորմոնի մակարդակը ձեր արյան մեջ:

Ի՞նչն են հետազոտում

Տեստոստերոնը արական սեռական հորմոն է, որն օգնում է սերմնահեղուկի առաջացմանը և ազդում է տղամարդկանց սեռական ցանկությունների և հակման ձևավորման վրա: Տեստոստերոնն օգնում է նաև տղամարդկանց դեմքի և մարմնի արական տիպի մազածածկույթի առաջացմանը և կարևոր դեր խաղում նրանց կմախքային մկանների զարգացման մեջ: Տղամարդկանց մոտ տեստոստերոնի մեծ մասն արտադրվում է ամորձիներում, սակայն կարող է առաջանալ նաև մակերիկամներում:

Կանանց ձվարաններում, մակերիկամներում և այլ հյուսվածքներում արտադրվում է տեստոստերոնի շատ ավելի փոքր քանակներ: Նրանց մոտ տեստոստերոնի մի մասը տրոհվում է՝ առաջացնելով էստրադիոլ անվանումով էստրոգեն:

Տեստոստերոնի որոշ քանակներ հայտնաբերվում է ինչպես տղամարդկանց, այնպես էլ կանանց արյան մեջ: Արյան տեստոստերոնի թեստով չափվում է նրանց արյան մեջ տեստոստերոնի մակարդակը:

Ինչո՞ւ է այս թեստը նշանակվում

Բժիշկը կարող է ձեզ առաջարկել տեստոստերոնի թեստ, եթե՝

դուք տղամարդ կամ կին եք և ունեք երեխա ունենալու հետ կապված խնդիրներ
դուք տղամարդ եք և նշում եք սեռական ցանկության անկում
դուք տղամարդ եք և նշում եք էրեկցիայի հասնելու հետ կապված խնդիրներ
դուք կին եք և նշում եք արական բնույթի առանձնահատկություններ, օրինակ՝ ձայնի կոպտացում կամ մարմնի անսովոր մազակալում
դուք դեռահաստ տղա եք և ձեր սեռահասունացումը սկսվել է շատ վաղ կամ շատ ուշ:

Որոշ հիվանդություններ նույնպես կարող են ազդել ձեր արյան տեստոստերոնի մակարդակի վրա, օրինակ՝ դիաբետ, խոզուկ, տղամարդկանց մոտ՝ ամորձիների կամ կանանց մոտ՝ ձվարանների նորագոյացություններ: Ալկոհոլ շատ օգտագործող մարդիկ նույնպես կարող են ունենալ տեստոստերոնի ցածր մակարդակ:

Ինչպե՞ս նախապատրաստվել այս թեստին

Ձեզ կարող են խնդրել, որ տեստոստերոնի թեստ հանձնեք առավոտյան, քաղցած վիճակում: Նման դեպքում դուք պետք է դադարեցնեք որևէ սնունդ ընդունելը՝ սկսած նախորդ կեսգիշերից, իսկ առավոտյան ժամերին կարող եք խմել քիչ քանակով ջուր: Եթե ընդունում եք որևէ դեղամիջոց, նախապես քննարկեք ձեր բժշկի հետ թեստի արդյունքի վրա ձեր դեղի հավանական ազդեցությունը:

Ձեր արդյունքների մեկնաբանումը

Արյան տեստոստերոնի մակարդակի վրա կարող են ազդել տարբեր գործոններ, ներառյալ՝ տարիք, ընդհանուր առողջական վիճակ և օրգանիզմի նյութափոխանակության առանձնահատկություններ:

Դուք պետք է թեստի արդյունքը քննարկեք ձեր բժշկի հետ: Սա նշանակում է, որ թեստի պատասխանը պետք է ներկայացնեք ձեր բժշկին: