Պատճառներ - Պորտային ճողվածք

Հղիության ընթացքում պորտալարն անցնում է պտղի որովայնի մկանների փոքրիկ բացվածքով, որը սովորաբար փակվում է ծնվելուց անմիջապես հետո:

Եթե այդ մկանները որովայնի պատի միջին գծով լիարժեք չեն միանում միմյանց, կարող է առաջանալ պորտային ճողվածք ծնվելուց հետո կամ կյանքի ավելի ուշ շրջաններում:

Չափահաս մարդկանց մոտ չափազանց մեծ որովայնային (ներորովայնային) ճնշումը նպաստում է պորտային ճողվածքի դրսևորմանը: Ներորովայնային ճնշման բարձրացման պատճառներից են՝

• գիրություն
• բազմապտուղ հղիություններ
• որովայնի խոռոչում հեղուկի կուտակում
• նախկին որովայնային վիրահատություն
• երկարաժամկետ պերիտոնեալ դիալիզ, որն անցկացվում է երիկամային անբավարարության ժամանակ:

Ռիսկի գործոններ

Պորտային ճողվածքն առավել հաճախ հանդիպում է նորածինների շրջանում, հատկապես վաղաժամ ծնված և ցածր քաշ ունեցող երեխաների մոտ: ԱՄՆ-ում սևամորթ նորածինների մոտ պորտային ճողվածքի ռիսկը փոքր-ինչ բարձր է: Այս վիճակը տղաների և աղջիկների մոտ հանդիպում է գրեթե հավասար հարաբերակցությամբ:

Չափահասների մոտ ավելորդ քաշը կամ բազմապտուղ հղիությունը կարող են մեծացնել պորտային ճողվածքի առաջացման ռիսկը: Այս տեսակի ճողվածքը հակված է ավելի հաճախ հանդիպել կանանց մոտ: