Դաստակի ցավ. պատճառներ

Դաստակի ցավ. պատճառներ

Ձեր դաստակի որևէ մասի վնասումը կարող է առաջացնել ցավ և ազդել նույն դաստակը և ձեռքն օգտագործելու ունակության վար:

Ծանոթացեք նաև այս հոդվածի հետ ուղղակիորեն կապված այլ նյութերի հետ:

Վնասվածքներ

  • Հանկարծակի ազդեցություն. դաստակի վնասվածքները հաճախ առաջանում են, երբ դուք ընկնում եք դեպի առաջ՝ ձեռքը պարզած վիճակում: Սա կարող է առաջացնել գերլարվածություն (растяжение) և անգամ կոտրվածք: Դաստակի կիսալուսնաձև ոսկրի կոտրվածքը կարող է ուժեղ ցավ առաջացնել, սակայն ռենտգեն պատկերի վրա չերևալ:
  • Կրկնվող լարվածություն. ցանկացած ֆիզիկական ակտիվություն, որը ներառում է դաստակի կրկնվող պտտողական շարժումներ՝ սկսած թենիսի գնդակին հարվածելուց կամ ջութակ նվագելուց մինչև մեքենայի տևական վարում, կարող է բորբոքել դաստակի հոդերը շրջապատող հյուսվածքները կամ առաջացնել լարվածության (սթրես) կոտրվածքներ, հատկապես, եթե դուք այդ շարժումներն անում եք ժամեր շարունակ՝ առանց դադարի: Դե Կերվենի հիվանդությունը կրկնվող սթրեսային վնասվածք է, որն առաջացնում է ցավեր բութ մատի հիմքի շրջանում:

Հոդաբորբ (արթրիտ)

  • Օստեոարթրիտ. հոդաբորբի այս տեսակը զարգանում է, երբ ձեր ոսկրերի ծայրերը ծածկող աճառը ժամանակի ընթացքում «մաշվում» է: Դաստակի օստեոարթրիտը տարածված չէ և սովորաբար հանդիպում է միայն այն մարդկանց մոտ, ովքեր անցյալում վնասել են իրենց դաստակը:
  • Ռևմատոիդ արթրիտ. սա աուտոիմուն խանգարում է, որի ժամանակ օրգանիզմի իմունային համակարգը «գրոհում» և ախտահարում է սեփական հյուսվածքները: Ռևմատոիդ արթրիտը հաճախ է ներառում դաստակը: Եթե մի ձեռքի դաստակն ախտահարված է, սովորաբար ախտահարվում է նաև մյուս ձեռքինը:

Այլ հիվանդություններ և խնդիրներ

  • Կարպալ թունելի համախտանիշ. կարպալ (դաստակային) թունելի համախտանիշը զարգանում է, երբ համանուն թունելով անցնող և անմիջապես դաստակային լայնաձիգ կապանի տակ գտնվող միջնակ նյարդը ճնշվում կամ ճմլվում է:
  • Գանգլիոնային կիստաներ. փափուկ հյուսվածքի կիստաները սովորաբար առաջանում են դաստակի ափային մակերեսին: Գանգլիոնային կիստաները կարող են լինել ցավոտ, իսկ ցավը շարժումներից կարող է ուժգնանալ կամ մեղմանալ:
  • Կինբեքի հիվանդություն. այս խանգարումը սովորաբար հանդիպում է երիտասարդ չափահասների մոտ և դրսևորվում է դաստակի փոքր ոսկերերից մեկնումեկի հարաճուն քայքայմանբ: Հիվանդությունը զարգանում է, երբ այդ ոսկրի արյան հոսքը դժվարանում է:

Ռիսկի գործոններ

Դաստակի ցավը կարող է ի հայտ գալ ցանկացած մարդու մոտ՝ անկախ այն փաստից, թե դուք նստակյաց թե ակտիվ առօրյա ունեք: Սակայն ձեր ռիսկը բարձրանում է հետևյալ գործոնների առկայության ժամանակ:

  • Մարզական գործունեություն. դաստակի վնասվածքները տարածված են տարբեր մարզաձևերով զբաղվող կամ պարապող մարդկանց շրջանում, ում մոտ առկա է դաստակի վրա ուժեղ ազդեցություն կամ կրկնվող լարվածություն, այդ թվում՝ ֆուտբոլիստներ, թենիսիստներ, մարմնամարզիկներ, բուուլինգով կամ գոլֆով զբաղվողներ և այլն:
  • Կրկնվող աշխատանք. գրեթե բոլոր տեսակի ակտիվությունները, որոնցում ներառված են ձեր ձեռքերը և դաստակները, նույնսիկ մկրատով մազերը կտրելը, եթե կատարվում են բավարար ուժով և բավականին հաճախ, կարող են առաջացնել դաստակային ցավեր:
  • Որոշ հիվանդություններ և վիճակներ. հղիությունը, դիաբետը, գիրությունը, ռևմատոիդ արթրիտը և պոդագրան կարող են բարձրացնել կարպալ թունելի համախտանիշի զարգացման ռիսկը:

Հոդվածը վերանայվել է՝ 30-03-2021