Պատճառներ - Որովայնային աորտայի անևրիզմա

Անևրիզմաները կարող են զարգանալ աորտայի երկայնքով ցանկացած հատվածում:

Աորտայի անևրիզմաների մեծ մասն առաջանում է աորտայի այն հատվածում, որն անցնում է որովայնի խոռոչով և կոչվում է որովայնային աորտա:

Աորտայի պատը հյուծող (դեգեներատիվ) գործընթացների հստակ պատճառները մնում են անորոշ, սակայն հայտնի է, որ մի քանի բան կարող են հանգեցնել որովայնային աորտայի անևրիզմայի զարգացմանը:

• Զարկերակների կարծրացում, որը կոչվում է աթերոսկլերոզ. աթերոսկլերոզն առաջանում է, երբ ճարպը և այլ նյութեր կուտակվում են արյունատար անոթները ներսից պատող շերտի՝ լորձաթաղանթի վրա:
• Բարձր արյան ճնշում (հիպերտենզիա). բարձր արյան ճնշումը կարող է վնասել և թուլացնել աորտայի պատերը։
• Արյունատար անոթների հիվանդություններ. սրանք հիվանդություններ են, որոնք հանգեցնում են արյունատար անոթների բորբոքմանը (արտերիիտ):
• Վարակ աորտայում. հազվադեպ, որոշ բակտերիաների կամ սնկերի հարուցած վարակը կարող է առաջացնել որովայնի աորտայի անևրիզմա:
• Տրավմա (վնասվածք). օրինակ՝ ավտովթարի ժամանակ վնասվածք ստանալը կարող է առաջացնել որովայնային աորտայի անևրիզմա։

Ռիսկի գործոններ

Որովայնային աորտայի անևրիզմայի ռիսկի գործոնները հետևյալն են:

• Ծխախոտի օգտագործում. ծխելը աորտայի անևրիզմայի ամենաուժեղ ռիսկի գործոնն է: Ծխելը կարող է թուլացնել արյունատար անոթների, այդ թվում՝ աորտայի պատերը։ Սա բարձրացնում է աորտայի անևրիզմայի ձևավորման և անևրիզմայի պատռման ռիսկը: Որքան երկար ժամանակ և ավելի շատ եք ծխախոտ օգտագործում, այնքան ավելի մեծ է աորտայի անևրիզմայի զարգացման հավանականությունը: 65-ից 75 տարեկան տղամարդիկ, ովքեր ներկա կամ նախկին ծխողներ են, պետք է անցնեն հնարավոր որովայնային աորտայի անևրիզմայի հայտնաբերման ուլտրաձայնային հետազոտություն (սոնոգրաֆիա):
  
• Տարիք. որովայնային աորտայի անևրիզմաներն առավել հաճախ հանդիպում են 65 տարեկան և ավելի բարձր տարիքի մարդկանց մոտ:
• Արական սեռ. տղամարդկանց շրջանում որովայնային աորտայի անևրիզմաները շատ ավելի հաճախ են զարգանում, քան կանանց շրջանում:
• Սպիտակամորթ լինելը. սպիտակամորթ մարդիկ որովայնային աորտայի անևրիզմայի ավելի մեծ ռիսկի տակ են:
• Ընտանեկան պատմություն (անամնեզ). որովայնային աորտայի անևրիզմայի ընտանեկան պատմություն ունենալը մեծացնում է այս վիճակի ռիսկը:
• Այլ անևրիզմաներ. կրծքավանդակում աորտայի անևրիզմայի առկայությունը (կրծքային աորտայի անևրիզմա) կամ մեկ այլ մեծ արյունատար անոթում անևրիզմա ունենալը, ինչպիսին է ծնկի հետևի զարկերակը, կարող է մեծացնել որովայնային աորտայի անևրիզմայի ռիսկը:

Եթե ունեք աորտայի անևրիզմի ռիսկ, ձեզ կարող են տրվել դեղամիջոցներ արյան ճնշումը կարգավորելու և թուլացած զարկերակների լարվածությունը թեթևացնելու համար: