Պատճառներ - Աքիլեսյան ջլի պատռվածք

Ձեր աքիլեսյան ջիլը (գարշապար) օգնում է ձեզ, որ ձգեք ձեր ոտնաթաթը ներքև, բարձրանաք ձեր ոտքի մատների վրա և առաջ հրեք ձեր ոտքը քայլելիս:

Դուք այս ջիլն օգտագործում եք գրեթե ամեն անգամ, երբ քայլում եք և շարժում ձեր ոտնաթաթը: Աքիլեսյան ջիլը մարդու մարմնի ամենամեծ և ամենաուժեղ ջիլն է, որը կարող է դիմանալ մինչև 500 կգ ծանրության։

Պատռվածք սովորաբար առաջանում է ջլի այն հատվածում, որը գտնվում է մոտ 6 սանտիմետր վերև այն կետից, որտեղ ջիլը կպչում է կրունկոսկրին: Այս հատվածը կարող է հակված լինել պատռման, քանի որ արյան հոսքը թույլ է, ինչը նույնպես կարող է դժվարացնել վերականգնման ունակությունը:

Պատռվածքներ հաճախ առաջանում են ձեր աքիլեսյան ջլի լարվածության կտրուկ աճից (գերձգում): Տարածված օրինակներից են՝

• սպորտային ակտիվության ինտենսիվության բարձրացում, հատկապես այն մարզաձևերում, որոնք ներառում են ցատկ
• բարձրությունից ընկնելը
• փոսի վրայից քայլ անելը:

Ռիսկի գործոններ

Աքիլեսյան ջլի պատռման ռիսկը կարող է մեծանալ հետևյալ գործոններով:

• Տարիք. աքիլեսյան ջիլի պատռվածքների գագաթնակետը 30-ից 40 տարեկանն է:
• Սեռ. տղամարդկանց մոտ աքիլեսյան ջլի պատռման հավանականությունը մինչև հինգ անգամ ավելի մեծ է, քան կանանց մոտ:
• Ժամանցային մարզաձևեր. աքիլեսյան ջլի վնասվածքներն ավելի հաճախ տեղի են ունենում այնպիսի մարզաձևերի ժամանակ, որոնք ներառում են վազք, ցատկ և հանկարծակի մեկնարկներ և կանգառներ, ինչպիսիք են ֆուտբոլը, բասկետբոլը և թենիսը:
• Ստերոիդների ներարկումներ. բժիշկները երբեմն ստերոիդներ են ներարկում կոճային (սրունք-թաթային) հոդի մեջ՝ ցավն ու բորբոքումը նվազեցնելու համար: Այնուամենայնիվ, այս դեղամիջոցը կարող է թուլացնել մոտակա ջլերը և կապված է աքիլեսյան ջլերի պատռվածքների հետ:
• Որոշակի հակաբիոտիկներ. ֆտորխինոլոնային հակաբիոտիկները, ինչպիսիք են Ցիպրոֆլոքսասինը (Ցիպրո) կամ Լևոֆլոքասինը (Լևաքվին), մեծացնում են աքիլեսյան ջլի պատռման ռիսկը:
• Գիրություն. ավելորդ քաշը ավելի շատ է լարում այս ջիլը: