Ալկոհոլային հեպատիտ. պատճառներ

Ալկոհոլային հեպատիտ. պատճառներ

Ալկոհոլային հեպատիտը զարգանում է, երբ օգտագործված ալկոհոլը վնասում է լյարդը:

Այնուամենայնիվ, դեռ լիարժեքորեն պարզաբանված չէ, թե կոնկրետ ինչպես է ալկոհոլն ախտահարում լյարդը և ինչու է հեպատիտ զարգանում ալկոհոլ չարաշահող միայն որոշ մարդկանց շրջանում:

Բոլոր դեպքերում, հայտնի է, ալկոհոլային հեպատիտի առաջացման մեջ որոշակի դեր ունեն հետևյալ գործոնները՝

  • օրգանիզմի կողմից ալկոհոլի քայքայման արդյունքում առաջանում են խիստ թունավոր քիմիական նյութեր
  • այդ նյութերը նպաստում են լյարդի բորբոքային գործընթացներին, որի արդյունքում լյարդային բջիջները քայքայվում են
  • ժամանակի ընթացքում առողջ լյարդային հյուսվածքը փոխարինվում է սպիականով, որի արդյունքում տուժում է լյարդի գործունեությունը
  • որպես ալկոհոլային լյարդային հիվանդության վերնափուլ զարգանում է լյարդի անդառնալի սպիացում (ցիռոզ):

Ալկոհոլային հեպատիտի զարգացմանը նպաստող այլ գործոններից են՝

  • հեպատիտների այլ տեսակներ. եթե ունեք հեպատիտ C և շարունակում եք օգտագործել ալկոհոլ (նույնիսկ չափավոր քանակներով), ցիռոզի հավանականությունը բարձրանում է
  • թերսնուցում. ալկոհոլ չարաշահող բազմաթիվ մարդկանց մոտ առկա է նաև թերսնուցում, քանի որ նրանք լավ չեն սնվում կամ ալկոհոլի քայքայման արգասիքները խաթարում են սննդանյութերի ներծծումը (թերսնուցումը նպաստում է լյարդային բջիջների քայքայմանը):

Ռիսկի գործոններ

Ալկոհոլային հեպատիտի գլխավոր ռիսկի գործոնը օգտագործվող ալկոհոլի քանակն է, սակայն վտանգավոր չափաքանակի մասին որևէ հստակ տվյալ չկա: Բոլոր դեպքերում, ալկոհոլային հեպատիտ ունեցող մարդկանց մեծ մասն առնվազն 20 տարվա ընթացքում ամեն օր ընդունել է ավելի քան 100 գրամ ալկոհոլ (համարժեք է 7 բաժակ գինուն կամ նույնչափ գարեջրին):

Այնուամենայինիվ, ալկոհոլային հեպատիտ կարող է զարգանալ նաև ավելի քիչ քանակով ալկոհոլ օգտագործող անձանց կամ նրանց շրջանում, ովքեր ունեն այլ ռիսկի գործոններ, որոնք թվարկված են ստորև:

  • Սեռ. կանանց մոտ ալկոհոլային հեպատիտի զարգացման ռիսկն ավելի բարձր է, քան տղամարդկանց մոտ, որը հավանաբար պայմանավորված է ալկոհոլի յուրացման սեռային տարբերությամբ:
  • Գիրություն. ալկոհոլ չարաշահող գեր մարդկանց մոտ ալկոհոլային հեպատիտի զարգացման և վերջինիս ցիռոզի վերաճելու ռիսկերն ավելի բարձր են:
  • Գենետիկ գործոններ. հետազոտությունները վկայում են, որ կան որոշակի գենային գործոններ, որոնք մարդուն դարձնում են ալկոհոլային հեպատիտի նկատմամբ ավելի «խոցելի» (իրականում խիստ դժվար է տարբերակում անցկացնել գենետիկական և միջավայրային գործոնների միջև):
  • Ռասա և էթնիկ ծագում. սևամորթ և լատինոամերիկյան ծագման անձանց շրջանում ալկոհոլային հեպատիտի ռիսկը բարձրանում է:
  • Ալկոհոլի անդադար օգտագործում. տղամարդկանց համար 2 ժամվա ընթացքում 5 չափաբաժին կամ ավելի շատ և կանանց համար 4 չափաբաժին կամ ավելի շատ ալկոհոլի օգտագործումը կարող է բարձրացնել ալկոհոլային հեպատիտի զարգացման ռիսկը:

Հոդվածը վերանայվել է՝ 19-05-2021