Գրադարան

Ալկոհոլային հեպատիտ. պատճառներ

Ալկոհոլային հեպատիտ. պատճառներ

Time Read 2 րոպե

Ալկոհոլային հեպատիտը զարգանում է, երբ օգտագործված ալկոհոլը վնասում է լյարդը:

Այնուամենայնիվ, դեռ լիարժեքորեն պարզաբանված չէ, թե կոնկրետ ինչպես է ալկոհոլն ախտահարում լյարդը և ինչու է հեպատիտ զարգանում ալկոհոլ չարաշահող միայն որոշ մարդկանց շրջանում:

Հայտնի է, որ այս գործոնները դեր են խաղում ալկոհոլային հեպատիտի դեպքում՝

  • օրգանիզմի կողմից ալկոհոլի քայքայման արդյունքում առաջանում են խիստ թունավոր (տոքսիկ) քիմիական նյութեր
  • այդ նյութերը նպաստում են բորբոքմանը, որը քայքայում է լյարդային բջիջները
  • ժամանակի ընթացքում առողջ լյարդային հյուսվածքը փոխարինվում է սպիականով, որը խաթարում է լյարդի գործառույթը
  • ալկոհոլային լյարդային հիվանդության վերջին փուլը լյարդի անդառնալի սպիացումն է (ցիռոզ):

Այլ գործոնները, որոնք կարող են նպաստել ալկոհոլային հեպատիտին, ներառում են հետևյալը:

  • Հեպատիտների այլ տեսակներ. եթե ունեք հեպատիտ C և նաև խմում եք, նույնիսկ չափավոր, ավելի հավանական է, որ ձեզ մոտ կզարգանա ցիռոզ
  • Թերսնուցում. բազմաթիվ մարդիկ, ովքեր մեծ քանակությամբ խմում են, թերսնված են, քանի որ վատ են սնվում կամ ալկոհոլը և դրա կողմնակի արտադրանքները խանգարում են օրգանիզմին պատշաճ կերպով ներծծել սննդանյութերը: Սննդանյութերի պակասը նպաստում է լյարդի բջիջների վնասմանը:

Ռիսկի գործոններ

Ալկոհոլային հեպատիտի հիմնական ռիսկի գործոնը ձեր կողմից օգտագործվող ալկոհոլի քանակությունն է: Թե որքան ալկոհոլ է անհրաժեշտ ձեզ ալկոհոլային հեպատիտի վտանգի ենթարկելու համար, հայտնի չէ: Բայց այս հիվանդությունն ունեցող մարդկանց մեծամասնությունը առնվազն 20 տարի օրական ավելի քան 100 գրամ (3,5 ունցիա ) խմելու պատմություն ունի, որը համարժեք է յոթ բաժակ գինուն, յոթ բաժակ գարեջրին կամ յոթ բաժակ սպիրտին (օղուն):

Այնուամենայնիվ, ալկոհոլային հեպատիտը կարող է առաջանալ նաև նրանց մոտ, ովքեր քիչ են խմում և ունեն այլ ռիսկային գործոններ:

Այլ ռիսկի գործոնները ներառում են հետևյալը:

  • Սեռ. կարծես կանայք ալկոհոլային հեպատիտով հիվանդանալու ավելի մեծ ռիսկ ունեն՝ հավանաբար նրանց մոտ ալկոհոլային խմիչքի յուրացման ձևի տարբերությունների պատճառով:
  • Գիրություն. ավելորդ քաշ ունեցող շատ խմողների մոտ ավելի հավանական է, որ առաջանա ալկոհոլային հեպատիտ և այդ վիճակից անցնի ցիռոզի:
  • Գենետիկ գործոններ. հետազոտությունները ցույց են տալիս, որ ալկոհոլով առաջացած լյարդի հիվանդության մեջ կարող է լինել գենետիկ բաղադրիչ, թեև դժվար է առանձնացնել գենետիկ և շրջակա միջավայրի գործոնները:
  • Ռասա և էթնիկ պատկանելիություն. սևամորթներն ու իսպանացիները կարող են ալկոհոլային հեպատիտի ավելի բարձր ռիսկի ենթարկվել:
  • Անդադար խմելը (запой). տղամարդկանց համար երկու ժամվա ընթացքում հինգ չափաբաժին կամ ավելի խմիչքներ խմելը և կանանց համար չորս չափաբաժին կամ ավելի խմիչքները կարող են մեծացնել ալկոհոլային հեպատիտի ռիսկը:

Հոդվածը տեղադրվել է՝ 19-05-2021 վերանայվել է՝ 16-03-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով