Բուժում - Ալկոհոլային հեպատիտ

Ալկոհոլային հեպատիտի բուժումը ներառում է խմելուց հրաժարվելը և լյարդի վնասման գանգատներն ու ախտանշանները թեթևացնող բուժումները:

Ալկոհոլի օգտագործման դադարեցում

Եթե ձեզ ախտորոշել են ալկոհոլային հեպատիտ, դուք պետք է դադարեցնեք ալկոհոլ օգտագործելը և այլևս երբեք չխմեք ալկոհոլ: Սա լյարդի վնասը հնարավորինս ետ զարգացնելու կամ հիվանդության վատթարացումը կանխելու միակ միջոցն է: Մարդիկ, ովքեր չեն դադարում խմել, ամենայն հավանականությամբ կառնչվեն կյանքին սպառնացող առողջական մի շարք խնդիրների հետ:

Եթե դուք կախված եք ալկոհոլից և ցանկանում եք դադարեցնել խմելը, ձեր բժիշկը կարող է խորհուրդ տալ ձեր կարիքներին համապատասխան բուժում: Խմելը կտրուկ դադարեցնելը կարող է վտանգավոր լինել, այնպես որ, եթե կախված եք, համոզվեք, որ ձեր բժշկի հետ քննարկել եք ձեր բուժման ծրագիրը:

Բուժումը կարող է ներառել՝

• դեղորայք
• խորհրդատվություն
• անանուն ալկոհոլիկների կամ այլ փոխօգնության խմբեր
• արտահիվանդանոցային կամ համայնքային բուժման ծրագրեր:

Թերսնման բուժում

Ձեր բժիշկը կարող է խորհուրդ տալ հատուկ սննդակարգ՝ սնուցման խնդիրները շտկելու համար: Դուք կարող եք դիմել դիետոլոգի, ով կարող է առաջարկել ձեր պակաս վիտամինների և սննդանյութերի փոխլրացման ուղիներ:

Եթե դուք դժվարանում եք ուտել, ձեր բժիշկը կարող է խորհուրդ տալ խողովակով կերակրում: Խողովակը (զոնդ) անցնում է ձեր կոկորդով դեպի ստամոքս, այնուհետև խողովակի միջով տրվում է հատուկ սննդանյութերով հարուստ հեղուկ սնունդ:

Լյարդի բորբոքումը մեղմացնող դեղամիջոցներ

Եթե ունեք ծանր ալկոհոլային հեպատիտ, ձեր բժիշկը կարող է խորհուրդ տալ հետևյալը:

• Կորտիկոստերոիդներ. aյս դեղերը ցույց են տվել որոշ կարճաժամկետ օգուտներ՝ մեծացնելով ծանր ալկոհոլային հեպատիտով հիվանդ որոշ մարդկանց ապրելիությունը: Այնուամենայնիվ, կորտիկոստերոիդներն ունեն լուրջ կողմնակի ազդեցություններ և, որպես կանոն, չեն նշանակվում, եթե ունեք երիկամային անբավարարություն, ստամոքսաղիքային արյունահոսություն կամ վարակ:
• Պենտօքսիֆիլին (Պենտօքսիլ). ձեր բժիշկը կարող է խորհուրդ տալ այս հակաբորբոքային դեղամիջոցը, եթե դուք չեք կարող կորտիկոստերոիդներ ընդունել: Ալկոհոլային հեպատիտի դեպքում Պենտոքսիֆիլինի (Պենտօքսիլ) օգուտը պարզ չէ: Հետազոտությունների արդյունքները հակասական են:

Լյարդի փոխպատվաստում

Ծանր ալկոհոլային հեպատիտ ունեցող բազմաթիվ մարդկանց համար առանց լյարդի փոխպատվաստման մահացության վտանգը մեծ է:

Պատմականորեն, ալկոհոլային հեպատիտ ունեցողները լյարդի փոխպատվաստման թեկնածուներ չեն եղել, քանի որ փոխպատվաստումից հետո նրանք կարող են վերադառնալ վնասակար խմելուն: Այնուամենայնիվ, վերջին հետազոտությունները ցույց են տալիս, որ ծանր ալկոհոլային հեպատիտով ճիշտ ընտրված հիվանդների մոտ փոխպատվաստումից հետո ապրելիության մակարդակը նման է այլ տեսակի լյարդի հիվանդություն ունեցողների լյարդի փոխպատվաստման ցուցանիշներին:

Զրուցեք այս թեմայով ձեր բժշկի հետ: