Ապենդիցիտ․ պատճառներ

Ապենդիցիտ․ պատճառներ
Անգլերեն անվանումը՝ Appendicitis Causes

Ապենդիցիտը որդանման ելունի՝ ապենդիքսի բորբոքումն է, որն աղիքային բարակ ելուն է՝ կպած ձեր հաստ աղիների աջ կողմի հատվածին՝ կույր աղիքին։

Որդանման ելունը սովորաբար մատի չափ է։

Ապենդիցիտի հստակ պատճառը հայտնի չէ, սակայն որոշակի նշանակություն ունի այդ ելունի լուսանցքում հայտնված կղանքը (հատկապես՝ կղանքի «քարացած» կտորներ) կամ սննդային պինդ մնացուկները։ Նման դեպքերում որդանման ելունը խցանվում է, բորբոքվում, որից հետո՝ վարակվում։

Կղանքով կամ սննդային մնացուկներով ելունի երկարատև խցանման ժամանակ կարող են զարգանալ նաև արյունամատակարարման վատացում՝ իշեմիա, իսկ այնուհետև՝ ելունի մեռուկացում (նեկրոզ)։ Բորբոքված ելունը վարակվելիս կարող է զարգանալ թարախային ապենդիցիտ, որն էլ կարող է պատռվել՝ առաջացնելով պերիտոնիտ և սեպսիս։

Թեև ապենդիցիտը կարող է առաջանալ բոլոր տարիքներում, ավելի հաճախ հանդիպում է երեխաների ու երիտասարդ տարիքի չափահասների մոտ։

Եթե դուք կարծում եք, որ դուք կամ ձեր ընտանիքից մեկնումեկն ունի ապենդիցիտ, ապա շատ կարևոր է, որպեսզի առանց ուշացնելու դիմեք ձեր բժշկին կամ վիրաբուժական բաժանմունք ունեցող որևէ հիվանդանոց։

Հոդվածը վերանայվել է՝ 21-05-2019