Ապենդիցիտ

Ապենդիցիտը կույր աղու որդանման ելունի՝ ապենդիքսի բորբոքումն է։

Ապենդիքսը բարակ որդանման ելուն է, որը միացած է որովայնի աջ կողմում` զստափոսի շրջանում տեղակայված հաստ աղու «կույր աղիք» կոչվող հատվածին։ Որդանման ելունը մոտավորապես ձեռքի մատի չափսի է։

Ապենդիցիտի հստակ պատճառը հայտնի չէ, սակայն կարող է առաջանալ ելունի լուսանցքը սննդով կամ աղիքային պարունակությամբ խցանվելուց, որը բերում է ելունի բորբոքման և վարակման։ Ապենդիցիտը կարող է զարգանալ ցանկացած տարիքում, սակայն ավելի հաճախ հանդիպում է երեխաների և երիտասարդների շրջանում՝ 10-30 տարեկան միջակայքում։

Ապենդիցիտի հիմնական նշաններն են որովայնի ստորին աջ (զստափոսի) շրջանի ցավերը, ջերմության բարձրացումը, սրտխառնոց և փսխումները։ Որոշ մարդկանց մոտ նաև կարող է առաջանալ փորլուծություն։

Ապենդիցիտի վաղ ախտորոշումը կարևոր է, այլապես կարող է զարգանալ որդանման ելունի թափածակում (պերֆորացիա) և այնպիսի ծանր բարդություններ, ինչպիսիք են սուր տարածուն պերիտոնիտը և սեպսիսը։

Ապենդիցիտի հիմնական բուժումը բորբոքված ելունի վիրահատական հեռացումն է, որը հայտնի է որպես «ապենդէկտոմիա»։ Որդանման ելունը կենսականորեն անհրաժեշտ օրգան չէ, և դրա հեռացումը որևէ կերպ չի կարող ազդել ձեր հետագա առողջության վրա։

Ապենդիցիտի կանխարգելման որևէ ապացուցված մեթոդ, այդ թվում՝ որևէ սննդակարգ գոյություն չունի։

Հոդվածը վերանայվել է՝ 25-04-2021