Պատճառներ - Բելի պարալիզ

Բելի պարալիզի (պարալիչի) առաջացման ճշգրիտ պատճառը պարզ չէ, սակայն այս վիճակը հաճախ կապված է վիրուսային վարակի հետ:

Վիրուսները, որոնք կապված են Բելի պարալիզի հետ, ներառում են վիրուսներ, որոնք առաջացնում են՝

• հասարակ և սեռական հերպես (հերպես սիմպլեքս)
• ջրծաղիկ և գոտևորող հերպես (հերպես զոստեր)
• վարակային մոնոնուկլեոզ (Էպշտեյն-Բար)
• ցիտոմեգալովիրուսային վարակներ
• շնչառական հիվանդություններ (ադենովիրուս)
• կարմրախտ (գերմանական կարմրուկ)
• խոզուկ (խոզուկի վիրուս)
• գրիպ (ինֆլուենցա B)
• ձեռքի-ոտք-բերանի հիվանդություն (կոքսակիվիրուս):

Դեմքի մկանները կառավարող նյարդը գանգի խոռոչից դեպի դեմք դուրս է գալիս ոսկրային նեղ խողովակով: Բելի պարեզի դեպքում դիմային (ֆացիալ) նյարդը բորբոքվում և այտուցվում է, որը սովորաբար կապված է վիրուսային վարակի հետ: Բացի դեմքի մկաններից, նյարդն ազդում է արցունքների և թքի արտադրության, համի զգացողության և միջին ականջի փոքրիկ (լսողական) ոսկորի վրա:

Ռիսկի գործոններ

Բելի պարալիզն ավելի հաճախ հանդիպում է այն մարդկանց մոտ, ովքեր՝

• hղի են, հատկապես` երրորդ եռամսյակում կամ ովքեր ծննդաբերել են մինչև մեկ շաբաթ առաջ
• ունեն վերին շնչառական որևէ վարակ, ինչպիսիք են գրիպը կամ մրսածությունը (սուր շնչառական վիրուսային վարակ կամ ՍՇՎՎ)
• ունեն շաքարային դիաբետ
• ունեն բարձր արյան ճնշում (հիպերտենզիա)
• ունեն ավելորդ քաշ կամ գեր են:

Բելի պարալիզի կրկնակի նոպաները հազվադեպ են: Սակայն, երբ դրանք կրկնվում են, հաճախ առկա է կրկնվող նոպաների ընտանեկան պատմություն (անամնեզ): Սա ենթադրելու տեղիք է տալիս, որ Բելի պարալիզը կարող է կապ ունենալ ձեր գեների հետ: