Կալցիում - Լաբորատոր թեստեր

Կալցիումը կարևոր է, քանի որ անհրաժեշտ է առողջ և ամուր ոսկորների համար:

Կալցիումն անհրաժեշտ է նաև ձեր մկանների, նյարդերի և սրտի նորմալ գործունեության համար: Կալցիումը նաև օգնում է ձեր արյան մակարդմանը:

Ի՞նչն են հետազոտում

Ձեր օրգանիզմի գրեթե ամբողջ կալցիումը ներկայացված է ձեր ոսկորներում և ատամներում, իսկ մնացած փոքր մասը՝ ձեր արյան մեջ: Արյան կալցիումի թեստը արյան մեջ պարունակվող կալցիումի մակարդակի չափման հետազոտությունն է:

Դուք ամեն օր մեզի հետ կորցնում եք կալցիումի որոշակի քանակ: Ուստի բժիշկը նաև կարող է նշանակել մեզի թեստ, որ ստուգի, թե կալցիումի ինչ քանակություն է ձեր երիկամներն արյունից արտազատում և մեզով հեռացնում:

Ինչո՞ւ է այս թեստը նշանակվում

Կան բազմաթիվ հնարավոր պատճառներ, թե ինչու և երբ դուք կարող եք արյան կալցիումի թեստի կարիքն ունենալ:

Եթե ունեք հոգնածություն և թուլություն, ախորժակի կորուստ և ծարավի զգացում, շատ միզարձակելու կարիք, փորկապություն կամ որովայնային ցավեր, ձեր բժիշկը կարող է կասկածել, որ ձեր արյան մեջ առկա է նորմայից ավելի մեծ քանակի կալցիում:

Բժիշկը կարող է կարծել, որ ձեր արյան կալցիումի քանակն անբավարար է, եթե նշում եք բերանի շուրջը, ձեռքերում կամ ոտքերում թմրածություն կամ ունեք մկանային կծկանքներ (սպազմ):

Արյան կալցիումի թեստը նաև կարող է հանձնվել այլ հետազոտությունների հետ միասին, հատկապես, եթե ունեք կամ բժիշկը կասկածում է, որ ունեք հետևյալ հիվանդություններից կամ վիճակներից մեկնումեկը՝

• երիկամային հիվանդություն
• երիկամի քարեր
• ոսկրային հիվանդություն
• վահանաձև գեղձի հիվանդություններ
• մարսողական հիվանդություններ
• քաղցկեղի որոշ տեսակներ
• թերսնուցում:

Դուք կարող եք ունենալ արյան կալցիումի կրկնակի թեստի կարիք, եթե՝

• ունեք երիկամային հիվանդություն
• ունեք փոխպատվաստված երիկամ
• բուժվում եք կալցիումով կամ վիտամին D-ի հավելումներով
• ունեք քաղցկեղի որոշ տեսակներ, մասնավորապես, եթե դրանք ազդում են ձեր ոսկորների վրա:

Ինչպե՞ս նախապատրաստվել այս թեստին

Բժիշկը կարող է խնդրել, որ թեստից որոշակի ժամանակ առաջ դադարեցնեք այնպիսի դեղերի ընդունումը, ինչպիսիք են անտացիդները, միզամուղները և վիտամին D-ի հավելումները: Այս և որոշ այլ դեղերը կարող են պարունակել կալցիում կամ ազդել կալցիումի մակարդակի վրա:

Արյան կալցիումի թեստի հանձնումն այլ պարտադիր պայմաններ չունի:

Ձեր արդյունքների մեկնաբանումը

Կալցիումի թեստը տեղեկատվություն է տրամադրում այն մասին, թե ինչքան կալցիում է պարունակվում ձեր արյան մեջ, սակայն որևէ տվյալ չի ներկայացնում այն մասին, թե ինչ քանակի կալցիում է առկա ձեր ոսկորներում:

Ձեր թեստի արդյունքները և հետագա քայլերը ճիշտ հասկանալու համար դուք պետք է զրուցեք ձեր բժշկի հետ:

Լրացուցիչ տեղեկատվություն

Կալցիումի թեստի մասին

Այցելեք մեր կայքի Մեդեքս-Lab բաժինը, որ իմանաք ընդհանուր և իոնական կալցիումի մասին ավելի մանրակրկիտ տեղեկություններ։

Արյան թեստերի մասին

Կարդացեք Մեդեքս-Health բաժնի արյան թեստերի ուղեցույցը, որ ընդհանուր տեղեկություններ իմանաք արյան թեստերի մասին, այդ թվում՝

• ինչի՞ մասին հոգ տանել մինչև լաբորատորիա այցելելը
• ի՞նչ է տեղի ունենում արյան հետազոտության ընթացքում
• ինչպիսի՞ ճշգրություն ունեն հետազոտության արդյունքները։