Skip to main content

Նկարագիր - Ցերեբրալ պարալիչ

Մանկական ուղեղային կամ ցերեբրալ պարալիզը կամ պարզապես ուղեղային պարալիզը (պարալիչ, կաթված, լուծանք) հիվանդությունների խումբ է, որոնք ազդում են շարժումների և կեցվածքի վրա:

Այն պայմանավորված է զարգացող գլխուղեղի վնասմամբ, առավել հաճախ՝ ծնվելուց առաջ:

Ախտանիշներն ի հայտ են գալիս մանկության կամ նախադպրոցական տարիքում և տարբերվում են՝ սկսած շատ թեթևից մինչև խիստ ծանր: Ուղեղային պարալիզ ունեցող երեխաները կարող են ունենալ գերակտիվ ռեֆլեքսներ: Ձեռքերը, ոտքերը և իրանը կարող են ստանալ թորշոմած տեսք: Կամ կարող է առաջանալ մկանների ձգվածություն (ռիգիդություն), որը հայտնի է որպես սպաստիկություն: Ախտանիշները նաև կարող են ներառել անհամաչափ կեցվածք, շարժումներ, որոնք հնարավոր չէ վերահսկել, անկայուն քայլվածք կամ դրանց որոշակի համադրություն:

Ուղեղային պարալիզի դեպքում կուլ տալը կարող է դժվարացած լինել: Այն նաև կարող է առաջացնել աչքի մկանների անհավասարակշռություն, երբ աչքերը չեն կենտրոնանում նույն առարկայի վրա: Այս վիճակն ունեցող մարդկանց մոտ կարող է նվազեցնել հոդերի շարժման տիրույթը՝ մկանների մշտական ձգվածության պատճառով:

Ուղեղային պարալիզի պատճառը և դրա ազդեցությունն առօրյա գործառույթների վրա տարբերվում են անձից անձ: Ուղեղային պարալիզ ունեցող որոշ մարդիկ կարող են քայլել, իսկ մյուսներն՝ ունենալ օգնության կարիք: Որոշ մարդիկ ունեն մտավոր խանգարումներ, իսկ մյուսները՝ ոչ: Ուղեղային պարալիզ ունեցող որոշ մարդկանց մոտ նաև կարող են հանդիպել էպիլեպսիա, կուրություն կամ խլություն:

Վերջնական բուժում չկա, սակայն բուժական միջոցառումները կարող են օգնել կարևոր և ինքնասպասարկման գործառույթների բարելավմանը: Ուղեղային պարալիզի ախտանիշները կարող են փոխվել երեխայի զարգացման ընթացքում, սակայն վիճակը գրեթե երբեք չի վատթարանում: Հիվանդությունը, որպես կանոն, ժամանակի ընթացքում մնում է անփոփոխ:

Հոդվածը հրապարակվել է՝ 16-02-2024
Վերջին վերանայում՝ 23-04-2024