Ախտանիշներ - Կրծքավանդակային տրավմա

Կրծքավանդակի վնասվածքին հաջորդող ախտանիշները մեծամասամբ կախված են վնասվածքի տեսակից և առաջացրած հետևանքներից:

Կրծքավանդակի վնասվածքից հետո ավելի հաճախ հանդիպում են հետևյալ ախտանիշները՝

• կրծքավանդակի ցավ, որը ուժեղանում է շնչելիս, ծիծաղելիս, հազալիս կամ փռշտալիս
• շոշափելիս՝ կրծքավանդակի վնասված շրջանում պատի արտասովոր փափկություն կամ գոգավորություն
• ենթամաշկային փափուկ հյուսվածքների սալջարդ և արյունազեղում, որը հետագայում վերածվում է կապտուկի
• վնասված շրջանի այտուցվածություն:

Կրծքավանդակի տրավմայի ժամանակ հաճախ հանդիպող կողի կոտրվածքի նշաններից են՝

• ցավեր, որոնք ուժեղանում են խոր շնչելիս
• կրծքի կամ թիկունքի կողմից կողերի ցավոտություն
• շոշափելիս՝ ոսկային կամ ոսկրաբեկորային կրեպիտացիա
• սուր շնչարգելություն և հևոց:

Ե՞րբ դիմել բժշկին

Եթե ստացել եք կրծքավանդակի վնասվածք և նշում եք վերոնշյալ ախտանիշներից մեկնումեկը կամ բոլորը, առանց հետաձգելու կապ հաստատեք ձեր բժշկի հետ կամ այցելեք մոտակա բուժկենտրոն:

Ե՞րբ զանգել 1-03 կամ դիմել անհետաձգելի բուժօգնության

Եթե կրծքավանդակի վնասվածքն ուղեկցվում է շնչառության կամ արյան շրջանառության խանգարումներով, ապա մեծ է ծանր կամ կյանքին սպառնացող բարդությունների զարգացման ռիսկը:

Ծանր տրավմաների ժամանակ կարող է զարգանալ ներքին արյունահոսություն: Սա կարող է լինել տեսանելի (օրինակ՝ հազալիս արյուն) կամ ոչ հեշտ հայտնաբվող (օրինակ՝ մաշկի գունատություն, սրտխառնոց, ծարավի զգացում):

Անհապաղ զանգեք 1-03 և կանչեք շտապ օգնություն կամ կազմակերպեք տուժողի մոտակա հիվանդանոց տեղափոխվելը, եթե առկա է՝

• դժվարաշնչություն և հևոց
• քնկոտություն կամ շփոթվածություն
• դեղնա-կանաչավուն կամ կարմրավուն խորխով հազ
• գունատ, խոնավ և կպչուն մաշկ
• կրծքավանդակի ցավ, որը խանգարում է շնչառությանը:

Ի՞նչ անել մինչև շտապ օգնության ժամանումը

Կրծքավանդակային տրավմայի առաջին օգնությունը կախված է վնասվածքի տեսակից:

• Եթե կրծքավանդակի որևէ շրջանից առկա արյունահոսություն, տվյալ շրջանը ծածկեք մաքուր վիրակապով և սեղմեք այնպես, որ արյունահոսությունը մեղմանա կամ դադարի:
• Եթե առկա է թափանցող վերք և վերքի մեջ նկատում եք օտար մարմին, այն պետք է հեռացվի:
• Մարմնին տվեք այնպիսի դիրք, որ կրծքավանդակի վնասված կողմը լինի ներքևում:
• Ծայրահեղ ծանր դեպքերում կարող է առաջանալ սիրտ-թոքային վերակենդանացման միջոցառումներ սկսելու անհրաժեշտություն: