Ցավ կրծքավանդակի շրջանում

Եվ պատճառը բոլորիս հայտնի է. կրծքավանդակի շրջանում հանկարծակի սկսվող ցավը կարող է լինել սրտի նոպայի առաջին ահազանգը։

Ի՞նչ է կրծքավանդակի ցավը

Կրծքավանդակի շրջանի ցավերն ընդգրկում են մեր մարմնի վերին մասերը՝ ծնոտից սկսած մինչև կողաղեղի ստորին եզրը: Ելնելով նրանից, որ այն սրտամկանի սուր ինֆարկտի բնորոշ նշաններից մեկն է, ավելի անվտանգ է կրծավանդակային ցավերը կապել սրտի հետ, քանի դեռ հակառակը չի ապացուցվել։

Արդյոք իմ մոտ սրտի նոպա՞ է

Սրտամկանի ինֆարկտի ահազանգող նշանները կարող են շատ փոփոխական լինել, և պարտադիր չէ, որ դրանք լրիվ համընկնեն «դասագրքային» նկարագրությանը։ Այսպես, ինֆարկտի ժամանակ կրծքավանդակում տեղակայված ցավերը կարող են սկսվել ոչ թե հանկարծակի, այլ զարգանալ աստիճանաբար, և լինեն ոչ թե սաստիկ ուժեղ, այլ՝ թույլ։ Ավելին, սրտամկանի ինֆարկտը կարող է ընդհանրապես ցավեր չառաջացնել կամ էլ դրանք տեղակայվեն կրծավանդակից դուրս (օրինակ՝ ստամոքսի շրջանում՝ նմանվելով մարսողության խանգարմանը)։

Սրտամկանի ինֆարկտի մասին պետք է կասկածել, եթե ձեզ մոտ կա հետևյալ երեք նշաններից թեկուզ մեկնումեկը, որը սովորաբար տևում է 10 րոպե կամ ավելի՝

• կրծքավանդակի կենտրոնում՝ կրծոսկրի շրջանում անախորժության (դիսկոմֆորտի) զգացում կամ ցավ, որը կարող է դրսևորվել որպես ծանրության զգացում կամ լինել սեղմող, ճնշող կամ այրող բնութի
• ձեռքերում, ուսերում, պարանոցի, ծնոտի կամ մեջքի շրջանում անհարմարավետության կամ թմրածության զգացում
• այլ խնդիրներ, ինչպիսիք են՝
  • կոկորդում խեղդոցի զգացում
  • ձեռքերում ծանրության կամ անուժության զգացում
  • օդի պակասի զգացում
  • նողկանքի զգացում
  • սառը քրտնարտադրություն
  • գլխապտույտ կամ գլխում «դատարկության» զգացում։

Իրենց ուժգնությամբ կրծքավանդակի շրջանի ցավերը կարող են լինել սկսած թույլ զգացողություններից մինչև սաստիկ-անտանելի ցավերը։ Քանի դեռ սրտամկանի ինֆարկտը չի բացառվել, կրծքավանդակի շրջանի բոլոր տեսակի ցավերի դեպքում առաջինը պետք է մտածել սրտի նոպայի մասին։

Իհարկե, կան որոշ հուշող նշաններ ևս։ Օրինակ, սրտի նոպան ավելի հաճախ հանդիպում է 60-ն անց չաահասների մոտ (թեև սա բնավ չի նշանակում, որ ավելի երիտասարդների մոտ սրտամկանի ինֆարկտ չի կարող զարգանալ) կամ սրտային նոպա ունեցող մարդը ցավի տեղը ցույց է տալիս սեղմված բռունցքով կամ բացված ափով, այլ ոչ թե մատի ծայրով։

Ի՞նչ պետք է ես անեմ

Եթե ձեզ մոտ առկա է վերոնշյալ ախտանիշներից թեկուզ մեկը, առանց ձգձգելու զանգեք 1-03 և հրավիրեք շտապ բուժօգնություն։

Եթե դուք զգում եք կրծքավանդակի ցավեր, բայց՝ վերնշյալ նշաններից ոչ մեկը, դարձյալ, դիմեք ձեր բժշկին։ Բոլոր դեպքերում, պետք է ստուգել սրտի վիճակը։

2018 © Medex.am | Նյութից մեջբերումներ կատարելիս հղումը Medex.am-ին պարտադիր է: