Ախտանիշներ - Կրծքավանդակի ցավ

Կրծքավանդակի ցավը կարող է զգացվել տարբեր կերպ՝ կախված այն բանից, թե ինչն է առաջացնում ախտանիշը:

Հաճախ պատճառը ոչ մի կապ չունի սրտի հետ, սակայն առանց բժշկին դիմելու հեշտ չէ հասկանալ, թե արդյոք կրծավանդակի ցավն ունի սրտային, թե արտասրտային ծագում:

Սրտի հետ կապված կրծքավանդակի ցավ

Կրծքավանդակի ցավը հաճախ կապված է սրտային հիվանդության հետ: Սակայն սրտային հիվանդությամբ բազաթիվ մարդիկ ասում են, որ ունեն թեթև անհարմարավետություն (դիսկոմֆորտ), որը նրանք իրականում ցավ չէին անվանի: Սրտամկանի ինֆարկտի կամ սրտի այլ խնդրի պատճառով կրծքավանդակի դիսկոմֆորտը կարող է զգացվել որպես

• կրծքավանդակում ճնշում, լցվածություն, այրոց կամ սեղմում
• ճնշող կամ այրող ցավ, որը տարածվում է մեջքի, պարանոցի, ստորին ծնոտի, ուսերի և մեկ կամ երկու ձեռքերի վրա
• ցավ, որը տևում է ավելի քան մի քանի րոպե, ուժեղանում է ֆիզիկական ծանրաբեռնվածության դեպքում, անհետանում և վերսկսվում է կամ տարբերվում է ուժգնությամբ
• օդի պակասի զգացում և հևոց
• սառը քրտինք
• գլխապտույտ, ուշագնացության զգացում կամ թուլություն
• սրտազարկի արագացում
• սրտխառնոց կամ փսխում:

Այլ ծագման կրծքավանդակային ցավեր

Կարող է դժվար լինել ասելը՝ կրծքավանդակի ցավը կապված է սրտի հետ, թե ունի այլ պատճառ: Սովորաբար, ավելի քիչ հավանական է, որ կրծքավանդակի ցավն ունենա սրտային պատճառ, եթե այն ուղեկցվում է հետևյալով՝

• թթու համ կամ զգացում, որ սնունդը կրկին բարձրացել է բերան
• կուլ տալու խնդիր
• ցավ, որը թեթևանում կամ ուժեղանում է, երբ փոխում եք մարմնի դիրքը
• ցավ, որն ուժեղանում է, երբ դուք խորը շնչում եք կամ հազում եք
• ցավոտություն, երբ սեղմում եք ձեր կրծքավանդակի պատը
• ցավ, որը շարունակվում է ժամեր շարունակ:

Այրոցքի (изжога) դասական ախտանիշները` կրծոսկրի ետևում ցավոտ, այրման զգացողություն, կարող են առաջանալ սրտի կամ ստամոքսի հետ կապված խնդիրների պատճառով:

Ե՞րբ դիմել բժշկին

Եթե ​​ունեք նոր կամ անբացատրելի կրծքավանդակի ցավ կամ կարծում եք, որ սրտամկանի ինֆարկտ եք ունենում, անմիջապես զանգահարեք 1-03 և կանչեք շտապ բժշկական օգնություն: Մի՛ անտեսեք սրտամկանի ինֆարկտի ախտանիշները: Եթե ​​չեք կարող շտապ օգնություն կանչել կամ շտապ օգնության մեքենան չի կարող ձեզ մոտենալ, թող ձեր հարևանը կամ ընկերը ձեզ տանի մոտակա հիվանդանոց: Քշեք ինքներդ միայն այն դեպքում, եթե այլ տարբերակ չունեք: