Կրծքավանդակային ցավեր. ախտանիշներ

Կրծքավանդակի շրջանի ցավն ուղեկցվում է բազմաթիվ տարբեր զգացողություններով, որոնք կախված են ցավի առաջացման կամ նպաստող գործոններից:

Հաճախ կրծքավանդակային ցավը կամ դրա պատճառը որևէ առնչություն չունեն սրտի հետ, սակայն առանց բժշկի օգնության հեշտ չէ հասկանալ, թե արդյոք ձեր գանգատն ունի արտասրտային, թե սրտային ծագում:

Սրտային ծագման կրծքավանդակային ցավեր

Թեև կրծքավանդակի ցավը հաճախ կապվում է սրտային հիվանդության հետ, նման ունեցող բազմաթիվ մարդիկ ավելի հաճախ նշում են կրծքավանդակի շրջանում խիստ անհարմարավետություն (դիսկոմֆորտ), որը ոչ միշտ է նկարագրվում որպես ցավ: Ընդհանուր առմամբ, սրտամկանի ինֆարկտով կամ որևէ այլ սրտային խնդրով պատճառված կրծքավանդակի դիսկոմֆորտը կարող նկարագրվել կամ կապված լինել թվարկված նշաններից մեկնումեկի կամ մի քանիսի հետ՝

• կրծոսկրի տակ կամ կրծքավանդակի ձախ կեսում ճնշման, սեղմման, լցվածության, այրոցի կամ լարվածության զգացողություն
• ճնշող կամ սեղմող ցավ, որը ճառագայթվում է դեպի ձեր թիկունքը, պարանոցը, ստորին ծնոտը, ուսերը և մեկ կամ երկու ձեռքերը
• ցավ, որը շարունակվում է ավելի քան մի քանի րոպե և սաստկանում է ֆիզիկական գործ անելիս, հանդարտվում և վերսկսվում է կամ տարբեր ուժգնության է
• շնչարգելություն և հևոց
• սառը քրտինք
• գլխապտույտ կամ թուլություն
• սրտխառնոց կամ փսխում:

Այլ ծագման կրծքավանդակային ցավեր

Որոշ դեպքերում դժվար է սրտի հետ կապված կրծքավանդակային ցավերը տարբերակել այլ ծագման ցավերից: Այնուամենայնիվ, կրծքավանդակային ցավն ավելի քիչ հավանական է, որ կապված կլինի սրտային որևէ խնդրի հետ, եթե ավելի հաճախ դրսևորվում է որպես՝

• բերանում թթվահամ կամ սննդի ու թթու ստամոքսահյութի՝ բերան բարձրանալու զգացողություն
• կլման դժվարացում (դիսֆագիա)
• ցավ, որը մեղմանում կամ սաստկանում է, երբ դուք փոխում եք ձեր իրանի դիրքը կամ շարժում եք կրծքավանդակը
• ցավ, որն ուժեղանում է խորը ներշնչելիս կամ հազալիս
• կրծավանդակի պատը սեղմելիս լարվածություն
• ցավ, որը կայուն կերպով շարունակվում է ժամեր շարունակ:

Այրոցքի (изжога) դասական ախտանիշները (կրծոսկրի տակ ցավոտ այրող զգացողություն) կարող են առաջանալ ինչպես ձեր սրտի, այնպես էլ ստամոքսի հետ կապ ունեցող խնդիրների պատճառով:

Ե՞րբ դիմել բժշկին

Եթե ձեզ մոտ առաջացել են նոր կամ հանկարծակի կրծքավանդակային ցավեր կամ կասկածում եք, որ կարող եք ունենալ սրտամկանի ինֆարկտ, ապա առանց ուշացնելու զանգեք 1-03 և կանչեք շտապբուժօգնություն: