Skip to main content

Բուժում - Կրծքավանդակային ցավ

Կրծքավանդակի ցավի բուժումը տարբեր է՝ կախված նրանից, թե ինչն է ցավ պատճառում:

Դեղորայքային բուժում

Կրծքավանդակի ցավի ամենատարածված պատճառներից մի քանիսի բուժման մեջ օգտագործվող դեղերը ներառում են հետևյալը:

  • Զարկերակները թուլացնող (լայնացնող) դեղամիջոցներ. Նիտրոգիլցերինը, որը սովորաբար ընդունվում է ենթալեզվային հաբի տեսքով, թուլացնում է սրտի զարկերակները, որի շնորհիվ արյունը կարող է ավելի հեշտ հոսել նեղացած հատվածներով: Արյան ճնշման որոշ դեղամիջոցներ ևս թուլացնում և լայնացնում են արյունատար անոթները:
  • Ասպիրին. եթե բժիշկը կարծում է, որ ձեր կրծքավանդակի ցավն ունի սրտային ծագում, հավանաբար ձեզ Ասպիրին կտա:
  • Թրոմբոլիտիկ դեղամիջոցներ. եթե ունեք սրտամկանի ինֆարկտ, դուք կարող եք ստանալ արյան մակարդուկները (թրոմբները) քայքայող դեղամիջոցներ: Սրանք ազդում են՝ տարալուծելով մակարդուկը, որն արգելափակում է արյան մուտքը սրտամկան:
  • Արյունը նոսրացնող դեղամիջոցներ (հակամակարդիչներ). եթե ձեր սիրտը կամ թոքերը սնուցող զարկերակում արյան մակարդուկ (թրոմբ) ունեք, հավանաբար ձեզ կտրվեն դեղամիջոցներ, որոնք խանգարում են արյան մակարդմանը, որ կանխարգելվի ավելի շատ մակարդուկների առաջացումը:
  • Թթուն ճնշող դեղամիջոցներ. եթե կրծքավանդակի ցավը պայմանավորված է դեպի կերակրափող ետ հոսած ստամոքսի թթվով (ռեֆլյուքս), ձեր բժիշկը կարող է առաջարկել դեղամիջոցներ, որոնք նվազեցնում են ստամոքսում թթվի քանակը:
  • Հակադեպրեսանտներ. եթե խուճապի նոպաներ եք ունենում, ձեր բժիշկը կարող է նշանակել հակադեպրեսանտներ, որոնք կօգնեն ախտանիշների վերահսկմանը: Ձեզ նաև կարող է առաջարկվել որևէ հոգեթերապևտիկ միջոցառում, ինչպիսիք են խոսքի թերապիան կամ կոգնիտիվ վարքաբանական թերապիան:

Վիրաբուժական և այլ միջամտություններ

Կրծքավանդակի ցավի ամենավտանգավոր պատճառներից մի քանիսը բուժելու միջամտությունները ներառում են հետևյալը:

  • Անգիոպլաստիկա և ստենտավորում. կրծքավանդակի ցավը, որն առաջանում է սիրտը սնուցող զարկերակի խցանման հետևանքով, հաճախ բուժվում է անգիոպլաստիկայի միջոցով: Բժիշկը աճուկի կամ դաստակի շրջանից մեծ արյունատար անոթի մեջ ներմուծում է ծայրին փուչիկ ունեցող կաթետեր, որն ուղղորդում է դեպի պսակային զարկերակի խցանված հատվածը: Փչված փուչիկը լայնացնում է զարկերակը, որից հետո փուչիկը թուլացվում է և կաթետերը հեռացվում: Կաթետերի փուչիկի ծայրի արտաքին կողմում հաճախ տեղադրվում է փոքր մետաղական ցանցային խողովակ (ստենտ): Երբ փուչիկը փչվում է, ստենտը ֆիքսվում է այդ շրջանում՝ մշտապես բաց պահելով զարկերակը:
  • Աորտո-կորոնար շունտավորում. այս միջամտության ընթացքում վիրաբույժները մարմնի մեկ այլ շրջանից վերցնում են արյունատար անոթ, որն օգտագործվում է այլընտրանքային ուղի ստեղծելու համար, որով արյունը շրջանցում է խցանված զարկերակը:
  • Շերտազատման անհետաձգելի վերականգնում. ձեզ կարող է անհրաժեշտ լինել անհետաձգելի վիրահատություն՝ աորտայի շերտազատումը վերականգնելու համար՝ կյանքին սպառնացող վիճակ, որի ժամանակ պատռվում է սրտից արյուն տեղափոխող գլխավոր զարկերակը՝ աորտան:
  • Թոքի վերափչում (ռեինֆլյացիա). եթե ունեք կոլապսի ենթարկված թոքեր, բժիշկը կարող է խողովակ մտցնել կրծքավանդակի մեջ՝ թոքը նորից փչելու համար:

Հոդվածը հրապարակվել է՝ 17-03-2021
Վերջին վերանայում՝ 07-04-2024