Գրադարան

Կրծքավանդակиի ցավ. ախտորոշում

Կրծքավանդակиի ցավ. ախտորոշում

Time Read 2 րոպե

Կրծքավանդակի ցավը միշտ չէ, որ ազդանշան է տալիս սրտամկանի ինֆարկտ​ի մասին:

Բայց սրտամկանի ինֆարկտն այն է, ինչը շտապ օգնության սենյակում բժիշկները սովորաբար ստուգում են առաջին հերթին, քանի որ դա հնարավոր ամենաանմիջական սպառնալիքն է ձեր կյանքի համար: Նրանք նաև կարող են ստուգել կյանքին վտանգ սպառնացող թոքային վիճակները, ինչպիսիք են կոլապսի ենթարկված թոքը (պնևմոթորաքս) կամ թոքերում արյան մակարդուկը (թրոմբոէմբոլիա):

Շտապ հետազոտություններ

Առաջին հետազոտություններից մի քանիսը, որոնք բժիշկը կարող է պատվիրել կրծքավանդակի ցավը գնահատելիս, ներառում են հետևյալը:

  • Էլեկտրասրտագրություն (ԷՍԳ). այս հետազոտությունը չափում է սրտի էլեկտրական ակտիվությունը։ Կրծքավանդակի, երբեմն՝ ձեռքերի և ոտքերի վրա տեղադրվում են կպչուն սպեղանիներ (էլեկտրոդներ): Լարերն էլեկտրոդները միացնում են սարքին, որը ցուցադրում կամ տպում է հետազոտության արդյունքները: ԷՍԳ-ն կարող է ցույց տալ՝ արդյոք սիրտը շատ արագ կամ շատ դանդաղ է կծկվում, թե ոչ: Վնասված սրտամկանը չի փոխանցում էլեկտրական ազդանշանները սովորական ձևով, ուստի ԷՍԳ-ն կարող է ցույց տալ, որ դուք ունեցել եք կամ ունեք սրտամկանի ինֆարկտ:
  • Արյան թեստեր. արյան անալիզները կարող են կատարվել՝ ստուգելու սովորաբար սրտամկանում առկա որոշ սպիտակուցների (օրինակ՝ տրոպոնին) կամ ֆերմենտների (օրինակ՝ կրեատինկինազ-ՄԲ) մակարդակի բարձրացումը: Սրտամկանի ինֆարկտի հետևանքով սրտի բջիջների վնասումը թույլ է տալիս, որ այս սպիտակուցները կամ ֆերմենտները մի քանի ժամվա ընթացքում արտահոսեն արյան մեջ:
  • Կրծքավանդակի ռենտգեն. կրծքավանդակի ռենտգենը կարող է ցույց տալ թոքերի վիճակը, սրտի և խոշոր արյունատար անոթների չափն ու ձևը: Կրծքավանդակի ռենտգենը նաև կարող է բացահայտել թոքերի հետ կապված խնդիրները, ինչպիսիք են թոքաբորբը կամ կոլապսի ենթարկված թոքը:
  • Համակարգչային տոմոգրաֆիա (ԿՏ). ԿՏ սքանավորումները կարող են գտնել թոքերի մեջ արյան մակարդուկ (թոքային էմբոլիա) կամ հայտնաբերել աորտայի շերտազատում:

Հետագա հետազոտություններ

Կախված կրծքավանդակի ցավի սկզբնական հետազոտությունների արդյունքներից, ձեզ կարող են անհրաժեշտ լինել լրացուցիչ հետազոտություններ, որոնք կարող են ներառել հետևյալը:

  • Էխոսրտագրություն (սրտի էխո). էխոսրտագրությունն օգտագործում է ձայնային ալիքներ՝ շարժման մեջ գտնվող սրտի տեսապատկերներ ստեղծելու համար: Սիրտը հնարավոր է «նկարել» ինչպես կրծքավանդակային, այնպես էլ կերակրափող ներմուծված տվիչով (տրանսդյուսեր, датчик): Վերջին տարբերակն ավելի տեսանելի է դարձնում սրտի տարբեր մասերը:
  • Համակարգչային տոմոգրաֆիա (ԿՏ). տարբեր տեսակի ԿՏ սքանավորումներ կարող են օգտագործվել սրտի (պսակային) զարկերակների խցանումները ստուգելու համար: ԿՏ-ով կորոնար անգիոգրաֆիան կարող է կատարվել նաև գունանյութով (կոնտրաստ), որ ստուգվի սրտի և թոքերի զարկերակների խցանումները և այլ խնդիրներ:
  • Սթրես թեստեր. սրանք չափում են, թե ինչպես են սիրտը և արյունատար անոթներն արձագանքում ֆիզիկական ծանրաբեռնվածությանը, որը կարող է ցույց տալ, թե արդյոք կրծքավանդակի ցավը կապված է սրտի հետ: Կան սթրես-թեստի տարբեր տեսակներ: Ձեզ կարող են խնդրել քայլել վազքուղու վրա կամ պտտել անշարժ հեծանիվի ոտնակները, երբ ձեզ միացված է ԷՍԳ: Կամ ձեզ կարող է տրվել ներերակային դեղամիջոց, որը խթանում է ձեր սիրտն այնպես, ինչպես ֆիզիկական վարժանքը:
  • Պսակային կամ կորոնար կաթետերիզացիա (կորոնարոգրաֆիա). այս հետազոտությունն օգնում է բժիշկներին, որ տեսնեն սրտի զարկերակների խցանումները: Արյունատար անոթի մեջ տեղադրվում է երկար, բարակ ճկուն խողովակ (կաթետեր), սովորաբար՝ աճուկի կամ դաստակի շրջանում, որն ուղղորդվում դեպի սիրտ: Գունանյութը (կոնտրաստ) կաթետերի միջով մղվում է դեպի սրտի զարկերակներ: Այն օգնում է, որ սրտի պսակային զարկերակներն ավելի հստակ երևան ռենտգենյան պատկերների և տեսանյութերի վրա:

Հոդվածը տեղադրվել է՝ 18-03-2021 վերանայվել է՝ 05-04-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով