Կրծքավանդակային ցավեր. ախտորոշում

Կրծքավանդակային ցավեր. ախտորոշում

Կրծքավանդակային, հատկապես՝ ետկրծոսկրային ցավերի պատճառը միայն սրտամկանի ինֆարկտը չէ:

Սակայն, անհետաձգելի բուժօգնություն ցուցաբերող բժիշկները, որպես կանոն, առաջին հերթին հաստատում կամ ժխտում են հենց սրտամկանի ինֆարկտը, քանի որ այս սրտային պատահարն ամենատարածված կյանքին սպառնացող վիճակն է: Բժիշկները նաև ստուգում են ծանր թոքային վիճակների առկայությունը, օրինակ՝ թոքերի կոլապս կամ թոքային արյունատար անոթներում արյան մակարդուկների (թրոմբ) առկայություն:

Նախնական հետազոտություններ

Բժշկի կողմից առաջին հերթին նշանակվող հետազոտությունները ներկայացվում են ստորև:

  • Էլեկտրասրտագրություն (ԷՍԳ). ԷՍԳ-ն մաշկի վրա տեղադրված էլեկտրոդների միջոցով գրանցում է սրտի էլեկտրական ակտիվությունը, որը կարող է փոփոխվել սրտամկանի ախտահարման կամ վնասման, այդ թվում՝ կրծքահեղձուկի կամ սրտամկանի ինֆարկտի ժամանակ:
  • Արյան հետազոտություններ. արյան հետազոտությունների օգնությամբ բժիշը ստուգում է որոշ արյան սպիտակուցների կամ ֆերմենտների մակարդակը, որոնք նորմայում առկա են միայն սրտամկանում, սակայն կարող են տարբեր արագությամբ և չափով արյան մեջ հայտնվել սրտամկանի սուր իշեմիկ վնասման՝ մեռուկացման ժամանակ:
  • Կրծքավանդակի ռենտգենոգրաֆիա. կրծքավանդակի ռենտգենը թույլ է տալիս հաստատել կամ ժխտել թոքային հիվանդությունների առկայությունը, ինչպես նաև գնահատել սրտի և խոշոր արյունատար անոթների կառուցվածքային շեղումները: Կրծքավանդակի ռենտգենոգրաֆիան նաև օգնում է հայտնաբերելու տարբեր թոքային խնդիրներ, օրինակ՝ թոքաբորբ կամ կոլապսի ենթարկված թոք:
  • Համակարգչային տոմոգրաֆիա (ԿՏ). ԿՏ սքանավորումը կարող է հայտնաբերել ձեր թոքային զարկերակում առկա արյան մակարդուկը (թոքային էմբոլիա) կամ ժխտել աորտայի շերտազատումը:

Լրացուցիչ հետազոտություններ

Կախված նախնական հետազոտությունների արդյունքներից, բժիշկը կարող է առաջարկել լրացուցիչ հետազոտություններ:

  • Էխոսրտագրություն. էխոսրտագրությունը («սրտի էխո») գերձայնային ալիքների օգնությամբ ստանում է սրտի աշխատանքը տեսահոլովակը «ռեալ ժամանակի մեջ»: Հնարավոր է սիրտը «նկարել» ինչպես կրծքավանդակային, այնպես էլ ըմպանով կերակրափող ներմուծված տվիչով (датчик):
  • Համակարգչային տոմոգրաֆիա (ԿՏ). ԿՏ սքանավորման տարբեր տեսակներ կարող են օգտագործվել՝ ստուգելու ձեր սրտի պսակային զարկերակների նեղացումը կամ խցանումը: Այս նպատակով կարող է օգտագործվել նաև ԿՏ-ի միջոցով պսակային անգիոգրաֆիա:
  • Սթրես թեստ. Սթրեստ-թեստը թույլ է տալիս գնահատել, թե ինչպես են ձեր սիրտը և արյունատար անոթները պատասխանում ֆիզիկական ծանրաբեռնվածությանը, որը կարող է վկայել կրծքավանդակային ցավերի սրտային ծագման մասին: Կան սթրես-թեստի տարբեր տեսակներ (քայլուղի, հեծանիվ), որոնց դեպքում ձեր սիրտը հետազոտվում է՝ չափելով զարկերակային ճնշումը, գրանցելով ԷՍԳ-ն կամ դիտելով սրտի աշխատանքը էխոսրտագրությամբ:
  • Կաթետերիզացիա (կորոնարոգրաֆիա). կորոնարոգրաֆիան օգտագործում է կոնտրաստ նյութ և ռենտգենյան ճառագայթներ, որպեսզի «ռեալ ժամանակի մեջ» պատկերի սրտի պսակային զարկերակների լուսանցքը: Այն մտնում է «սրտի կաթետերիզացիա» կոչվող ընդհանուր հետազոտությունների մեջ:

Հոդվածը վերանայվել է՝ 30-03-2021