Ախտորոշում - Միալգի էնցեֆալոմիելիտ

Քրոնիկ հոգնածության համախտանիշի կամ միալգիկ էնցեֆալոմիելիտի (ՔՀՀ/ՄԷ) ախտորոշումը հաստատող որևէ եզակի հետազոտություն կամ թեստ չկա:

Ախտանիշները կարող են նմանակել բազմաթիվ այլ առողջական խնդիրների, ներառյալ հետևյալը:

• Քնի խանգարումներ. հոգնածության պատճառ կարող են լինել քնի խանգարումները: Քնի հետազոտությունը (պոլիսոմնոգրաֆիա) կարող է որոշել, թե արդյոք ձեր հանգստին խանգարում են այնպիսի վիճակներ, ինչպիսիք են քնի օբստրուկտիվ ապնոէն, անհանգիստ ոտքերի համախտանիշը կամ անքնությունը:
• Այլ առողջական խնդիրներ. հոգնածությունը տարածված ախտանիշ է մի շարք առողջական վիճակների դեպքում, ինչպիսիք են սակավարյունությունը (անեմիա), շաքարային դիաբետը և թերակտիվ վահանաձև գեղձը (հիպոթիրեոզ): Լաբորատոր թեստերով կարող է ստուգվել ձեր արյունը՝ որոշ գլխավոր կասկածյների վերաբերյալ տվյալներ ստանալու համար:
• Հոգեկան առողջության հետ կապված խնդիրներ. հոգնածությունը նաև հոգեկան առողջության տարբեր խնդիրների ախտանիշ է, ինչպիսիք են դեպրեսիան և անհանգստությունը: Խորհրդատուն կարող է օգնել պարզելու, թե արդյոք այս խնդիրներից մեկն է ձեր հոգնածության պատճառը:

Նաև սովորական է, որ մարդիկ, ովքեր ունեն ՔՀՀ/ՄԷ, միաժամանակ ունենան այլ առողջական խնդիրներ, ինչպիսիք են քնի խանգարումները, գրգռված աղիքի համախտանիշը կամ ֆիբրոմիալգիան:

Իրականում, այս վիճակի և ֆիբրոմիալգիայի միջև այնքան համընկնող ախտանիշներ կան, որ որոշ հետազոտողներ երկու խանգարումները համարում են նույն հիվանդության տարբեր կողմեր:

Ախտորոշիչ չափորոշիչներ

ԱՄՆ Բժշկության ինստիտուտի կողմից առաջարկված ուղեցույցները ՔՀՀ/Մ-ի հետ կապված հոգնածությունը սահմանում են որպես՝

• այնքան ծանր, որ խանգարում է մինչև հիվանդությունը սովորական գործերով զբաղվելու ունակությունը
• նոր կամ հստակ սկիզբ
• հանգստի միջոցով էապես չի մեղմանում
• վատթարանում է ֆիզիկական, մտավոր կամ հուզական ծանրաբեռնվածությունից:

Այս վիճակի ախտորոշիչ չափանիշներին համապատասխանելու համար անձը նույնպես պետք է զգա այս երկու ախտանիշներից առնվազն մեկը՝

• հիշողության, կենտրոնացման և ուշադրության հետ կապված դժվարություններ
• գլխապտույտ, որը սաստկանում է պառկած կամ նստած դիրքից կանգնելիս:

Այս ախտանշանները պետք է ունենան առնվազն վեց ամսվա պատմություն և ունենան չափավոր, զգալի կամ ծանր դրսևորումներ ժամանակի առնվազն կեսում: