Գրադարան

Ծորանային կարցինոմա in situ. բուժում

Ծորանային կարցինոմա in situ. բուժում

Time Read 4 րոպե

Ծորանային կարցինոմա in situ-ի (DCIS) բուժումը հաջողության մեծ հավանականություն ունի:

Դեպքերի մեծ մասում այն ներառում է ուռուցքի հեռացում և դրա որևէ կրկնության կանխարգելում:

Կանանց մեծ մասի համար DCIS-ի բուժման տարբերակները ներառում են՝

  • կրծքագեղձի պահպանման վիրահատություն (լամպէկտոմիա) և ճառագայթային թերապիա
  • կրծքագեղձի հեռացման վիրահատություն (մաստէկտոմիա)։

Որոշ դեպքերում բուժման տարբերակները կարող են ներառել՝

  • միայն լամպէկտոմիա
  • լամպէկտոմիա և հորմոնային թերապիա
  • մասնակցություն կլինիկական փորձարկմանը, որը համեմատում է մանրակրկիտ մոնիթորինգը վիրահատության հետ։

Վիրահատություն

Եթե ձեր մոտ ախտորոշվել է DCIS, առաջին որոշումներից մեկը, որը պետք է կայացնեք, այն է՝ բուժել վիճակը լամպէկտոմիայի կամ մաստէկտոմիայի միջոցով:

  • Լամպէկտոմիա. լամպէկտոմիան վիրահատություն է, որի օգնությամբ հեռացվում է DCIS-ի տարածքը և այն շրջապատող առողջ հյուսվածքի եզրագիծը: Սա նաև հայտնի է որպես վիրաբուժական բիոպսիա կամ տեղային լայն հատում: Միջամտությունը թույլ է տալիս հնարավորինս շատ պահել ձեր կրծքից, և կախված հեռացված հյուսվածքի չափից, սովորաբար վերացնում է կրծքի վերականգնման (պլաստիկայի) անհրաժեշտությունը: Եթե ունեք այլ լուրջ առողջական խնդիրներ, կարող եք դիտարկել այլ տարբերակներ, ինչպիսիք են լամպէկտոմիան և հորմոնային թերապիան, լամպէկտոմիան միայնակ կամ առանց բուժման: Հետազոտությունները ցույց են տալիս, որ լամպէկտոմիայով բուժվող կանանց մոտ կրկնվելու ռիսկը մի փոքր ավելի բարձր է, քան մաստէկտոմիայի ենթարկված կանանց մոտ: Այնուամենայնիվ, երկու խմբերի միջև ապրելիության մակարդակը շատ նման է:
  • Մաստէկտոմիա. մաստէկտոմիան կրծքագեղձի ամբողջ հյուսվածքի հեռացման վիրահատություն է: Կրծքագեղձի պլաստիկ վիրահատությունը՝ ձեր կրծքի տեսքը վերականգնելու համար, կարող է կատարվել միաժամանակ կամ ավելի ուշ՝ ցանկության դեպքում:

DCIS-ով կանանց մեծ մասը լամպէկտոմիայի թեկնածուներ են: Այնուամենայնիվ, մաստեկտոմիա կարող է առաջարկվել հետևյալ իրավիճակներում:

  • Դուք ունեք DCIS-ի մեծ տարածք․ եթե ձեր կրծքի չափի համեմատ ախտահարված տարածքը մեծ է, լամպէկտոմիան կարող է ցանկալի կոսմետիկ արդյունքներ չտալ:
  • Առկա են DCIS-ի մեկից ավելի տարածքներ (բազմաօջախային կամ բազմակենտրոն հիվանդություն)․ DCIS-ի բազմաթիվ օջախները դժվար է հեռացնել լամպէկտոմիայի միջոցով: Սա հատկապես ճիշտ է, եթե DCIS-ը հայտնաբերվել է կրծքի տարբեր հատվածներում կամ քառորդներում:
  • Բիոպսիայի համար վերցված հյուսվածքային նմուշները ցույց են տալիս ոչ նորմալ բջիջներ հյուսվածքի նմուշի եզրին (լուսանցքում) կամ մոտ․ կարող է լինել ավելի շատ DCIS, քան ենթադրվում էր սկզբում, ինչը նշանակում է, որ լամպէկտոմիան կարող է համարժեք չլինել DCIS-ի բոլոր հատվածները հեռացնելու համար: Հնարավոր է, որ անհրաժեշտ լինի հեռացնել լրացուցիչ հյուսվածք, որը կարող է պահանջել մաստեկտոմիա՝ կրծքագեղձի ամբողջ հյուսվածքը հեռացնելու համար, եթե DCIS-ի ներգրավվածության տարածքը մեծ է կրծքի չափի համեմատ:
  • Դուք ճառագայթային թերապիայի թեկնածու չեք․ ճառագայթումը սովորաբար տրվում է լամպէկտոմիայից հետո: Դուք կարող եք ճառագայթային թերապիայի թեկնածու չլինել, եթե ախտորոշվել եք հղիության առաջին եռամսյակում, նախկինում ստացել եք կրծքավանդակի կամ կրծքագեղձի ճառագայթում կամ ունեք այնպիսի հիվանդություն, օրինակ՝ համակարգային կարմիր գայլախտ, որը ձեզ ավելի զգայուն է դարձնում ճառագայթային թերապիայի կողմնակի ազդեցությունների նկատմամբ։
  • Դուք մաստէկտոմիան գերադասում եք լամպէկտոմիայից․ օրինակ, դուք կարող եք չցանկանալ լամպէկտոմիա, եթե չեք ցանկանում ճառագայթային թերապիա անցնել:

DCIS-ը ոչ ինվազիվ է (դուրս չի գալիս ծորանի սահմաններից), ուստի վիրահատությունը սովորաբար չի ներառում ձեր թևատակի ավշային հանգույցների հեռացում: Ավշային հանգույցներում քաղցկեղ հայտնաբերելու հավանականությունը չափազանց փոքր է։

Եթե վիրահատության ընթացքում հեռացված հյուսվածքը ստիպում է ձեր բժշկին մտածել, որ ոչ նորմալ բջիջները կարող են տարածվել կրծքագեղձի ծորանից դուրս, կամ եթե դուք մաստէկտոմիայի եք ենթարկվում, որպես վիրահատության մաս կարող է իրականացվել պահակային հանգույցի բիոպսիա կամ որոշ ավշային հանգույցների հեռացում:

Ճառագայթային թերապիա

Ճառագայթային թերապիան օգտագործում է բարձր էներգիայի ճառագայթներ, ինչպիսիք են ռենտգենյան ճառագայթները կամ պրոտոնները՝ ոչ նորմալ բջիջները ոչնչացնելու համար: Ճառագայթային թերապիան լամպէկտոմիայից հետո նվազեցնում է DCIS-ի վերադարձի (կրկնվելու) կամ ինվազիվ քաղցկեղի վերածվելու հավանականությունը:

Ճառագայթումն առավել հաճախ տրվում է մի սարքով, որը շարժվում է ձեր մարմնի շուրջը՝ ճառագայթման փնջերն ուղղելով ձեր մարմնի ճշգրիտ կետերին (արտաքին փնջային ճառագայթում): Ավելի հազվադեպ, ճառագայթումը տրվում է ձեր կրծքի հյուսվածքի մեջ ժամանակավորապես տեղադրված սարքով (բրախիթերապիա):

Սովորաբար, ճառագայթումը նշանակվում է լամպէկտոմիայից հետո: Սակայն, այն կարող է անհրաժեշտ չլինել, եթե ունեք DCIS-ի միայն փոքր տարածք, որը համարվում է ցածր աստիճանի և ամբողջությամբ հեռացվել է վիրահատության ընթացքում:

Հորմոնային թերապիա

Հորմոնային թերապիան բուժում է, որն արգելափակում է հորմոնների՝ քաղցկեղի բջիջներին հասնելը և արդյունավետ է միայն քաղցկեղի այն տեսակների դեմ, որոնք աճում են ի պատասխան հորմոնների (հորմոն-ընկալիչ դրական կրծքագեղձի քաղցկեղ):

Հորմոնային թերապիան ինքնին DCIS-ի բուժում չէ, սակայն կարող է համարվել որպես լրացուցիչ (ադյուվանտ) թերապիա, որը տրվում է վիրահատությունից կամ ճառագայթումից հետո՝ փորձելով նվազեցնել ապագայում DCIS-ի կամ կրծքագեղձի ինվազիվ քաղցկեղի կրկնության զարգացման հավանականությունը:

Տամոքսիֆեն դեղամիջոցն արգելափակում է էստրոգենի ներգործությունը՝ հորմոն, որը սնուցում է կրծքագեղձի քաղցկեղի որոշ բջիջներ և խթանում ուռուցքի աճը: Այս ուղիով Տամոքսիֆենը նվազեցնում է կրծքագեղձի ինվազիվ քաղցկեղի զարգացման ռիսկը: Այն կարող է օգտագործվել մինչև հինգ տարի ժամկետով այն կանանց կողմից, ովքեր դեռ չեն անցել դաշտանադադարի փուլ (նախադաշտանադադար) կամ արդեն այդ փուլում են (հետդաշտանադադար):

Հետդաշտանադադարի փուլի կանայք նաև կարող են դիտարկել հորմոնային թերապիա՝ արոմատազի արգելակիչներ (ինհիբիտորներ) կոչվող դեղամիջոցներով: Այս դեղամիջոցները, որոնք ընդունվում են մինչև հինգ տարի, ազդում են՝ նվազեցնելով ձեր օրգանիզմում արտադրվող էստրոգենի քանակը:

Եթե որոշեք մաստէկտոմիա անել, հորմոնային թերապիայի անհրաժեշտության ավելի քիչ պատճառ կա:

Մաստէկտոմիայի դեպքում կրծքագեղձի փոքր քանակությամբ մնացած կրծքագեղձի հյուսվածքներում ինվազիվ քաղցկեղի կամ կրկնվող DCIS-ի ռիսկը շատ փոքր է: Հորմոնային թերապիայի ցանկացած հնարավոր օգուտ կտարածվի միայն մյուս կրծքի վրա:

Քննարկեք ձեր բժշկի հետ հորմոնային թերապիայի դրական և բացասական կողմերը:

Կլինիկական փորձարկումներ

Կլինիկական փորձարկումներն ուսումնասիրում են DCIS-ի կառավարման նոր մոտեցումներ, ինչպիսիք են ախտորոշումից հետո մանրակրկիտ վերահսկումը, այլ ոչ թե վիրահատությունը: Այն, թե կարող եք մասնակցել կլինիկական փորձարկմանը, կախված է ձեր կոնկրետ իրավիճակից: Խոսեք ձեր բժշկի հետ ձեր տարբերակների մասին:

Հոդվածը տեղադրվել է՝ 26-06-2023 վերանայվել է՝ 27-06-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով