Պատճառներ - Քթի միջնապատի շեղում

Քթի միջնապատը շեղվում է, երբ ձեր քթի միջնորմը` բարակ պատը, որը բաժանում է ձեր աջ և ձախ քթային անցուղիները, թեքվում է մի կողմ:

Միջնապատի շեղումը կարող է առաջանալ հետևյալ պատճառներով:

• Վիճակ, որն առկա է ի ծնե. որոշ դեպքերում միջնապատի շեղումն առաջանում է պտղի ներարգանդային զարգացման ժամանակ և առկա է ի ծնե:
• Քթի վնասվածք. միջնապատի շեղումը նաև կարող է լինել վնասվածքի հետևանք, որի հանգեցնում է քթի միջնապատի թեքման: Նորածինների մոտ նման վնասվածք կարող է առաջանալ ծննդաբերության ժամանակ: Երեխաների և չափահասների մոտ տարաբնույթ պատահարներ կարող են հանգեցնել քթի վնասվածքի և միջնապատի շեղման: Քթի վնասվածքն առավել հաճախ տեղի է ունենում կոնտակտային մարզաձևերի, կոպիտ մրցամարտերի, ինչպիսիք են ըմբշամարտը և բոքսը կամ ավտովթարների ժամանակ:

Ծերացման գործընթացը կարող է ազդել քթի կառուցվածքների վրա՝ ժամանակի ընթացքում վատթարացնելով շեղված միջնապատը:

Վարակի պատճառով քթի խոռոչների կամ հարքթային ծոցերի (սինուսներ) այտուցվածությունն ու գրգռումը կարող է ավելի նեղացնել քթային անցուղիները և հանգեցնել քթի փակվածության:

Ռիսկի գործոններ

Որոշ մարդկանց մոտ շեղված միջնապատն առկա է ի ծնե, որը առաջանում է պտղի զարգացման ընթացքում կամ ծննդաբերական վնասվածքի պատճառով: Ծնվելուց հետո շեղված միջնապատը ամենից հաճախ առաջանում է վնասվածքի պատճառով, որն իր նորմալ կենտրոնական դիրքից թեքում է ձեր քթի միջնապատը: Ռիսկի գործոնները ներառում են՝

• կոնտակտային մարզաձևով զբաղվելը
• ավտոմեքենա վարելիս ամրագոտին չամրացնելը: